"யாவரும் கேளீர்" இதழ் இம்மாதம் (செப்டம்பர் 2026) "பெருந்தமிழர் முதுமுனைவர் வ.அய்.சுப்பிரமணியம் நூற்றாண்டுச் சிறப்பிதழ்" என்ற வகையில் சிறப்பு பெறுகிறது. இவ்விதழானது வழக்கமான கட்டுரைகளுடன், வ.அய்.சு. அவர்களின் பெருமையை எடுத்துக்கூறுகின்ற பல கட்டுரைகளைக் கொண்டுள்ளது. பெருமுயற்சி மேற்கொண்டு இதழை வெளிக்கொணர்ந்த சிறப்பிதழின் ஆசிரியர் திரு அர. கோபாலகிருஷ்ணன் (எ) தஞ்சாவூர்க்கவிராயருக்கும், நூலின் ஆசிரியர் முனைவர் தி.நெடுஞ்செழியனுக்கும் மனமார்ந்த வாழ்த்துகளையும் நன்றியையும் தெரிவித்துக்கொள்கிறேன். படைப்புகளிலிருந்து சில பதிவுகளைக் காண்போம்.
"...தமிழ்ப் பல்கலைக்கழகத்தில் மே 2001இல் நடைபெற்ற இரண்டாவது பொதுப் பட்டமளிப்பு விழாவின்போது அவர் முதுமுனைவர் பட்டம் பெற்ற அதே நாளில் அதே மேடையில் முனைவர் பட்டம் பெற்றதைப் பெருமையாகக் கருதுகிறேன்...." (தமிழ்ப் பல்கலைக்கழகமே மூச்சாக வாழ்ந்த முதுமுனைவர் வ.அய்.சு../முனைவர் பா.ஜம்புலிங்கம், பக்.40-43)
"...பல்கலைக்கழகத்தில் திறக்கப்பட்ட எந்தக் கட்டடத்தின் சுவர்களிலும் தன் பெயரைப் பொறித்துவைக்காமல், 'தமிழ்ப் பல்கலைக்கழகத்தாரேம்' என்று எல்லா இடத்திலும் தமிழ்ப் பல்கலைக்கழகத்தவருள் தானும் ஒருவராய் இருந்துள்ளார்......." (தமிழ்ப் பல்கலைக்கழகத்தின் முகம் முதுமுனைவர் வ.அய்.சுப்பிரமணியம்/முனைவர் சீமான் இளையராஜா, பக்.44-47)
"...இன்றைய கல்வியாளர்களுக்கும் நிர்வாகிகளுக்கும் இவர் ஒரு முன்னுதாரணமாக இருக்கிறார் என்பதில் எவ்வித சந்தேகமுமில்லை!......." (இந்திய உயர்கல்வியில் ஒரு வைரத் தூண்/முனைவர் ரெ.மகேந்திரன், பக்.48-51)
"...அறச்சீற்ற நேர்மையும் ஆய்வாளுமைச் சீர்மையும் கடமையுணர்வு மேன்மையும் வ.அய்.சு.வின் தனித்த கச்சிதமான அடையாளம். மலர்ந்திருக்கின்ற வ.அய்.சு.நூற்றாண்டில், அவரது அறிவாராய்ச்சிச் சிந்தனைகளை மனங்கொண்டு அவரது கனவுகளை நனவாக்க செயலூக்கம் கொள்வோம்......." ('வடசேரி அய்யம்பெருமாள் நூற்றாண்டுச்சித்திரம்' என்னும் நூலின் ஆசிரியர் தென்னவன் வெற்றிச்செல்வன் உடனான செவ்வியிலிருந்து, பக்.52-61)
"...நெஞ்சுரமும் நேர்மையும், அயராத உழைப்பும், கண்டிப்பும் மிக்க ஆளுமயாளர் என்பதை அவர் பணியாற்றிய காலம் முழுவதும் உறுதிசெய்துகொண்டே இருந்தார்......." (நெஞ்சுரமும் நேர்மையும் கொண்ட ஆளுமை/முனைவர் க.அன்பழகன், பக்.73-75)
"கேரளாவில் வ.அய்.சு. உருவாக்கிய பன்னாட்டு திராவிட மொழியியல் கழகம் -ஒரு பார்வை" என்ற கட்டுரையில் அக்கழகத்தையும் அதன் முன்னோடி அமைப்புகளையும் நிறுவிய வரலாற்றுப்பின்னணியை விளக்குகிறார் முனைவர் பொன்.கதிரேசன். (பக்.62-64)
"திராவிடப் பல்கலைக்கழகம் உருவாக்கத்தில் முதுமுனைவர் வ.அய்.சு." என்ற கட்டுரையில் அதன் உருவாக்கத்தில் அவர் ஆற்றிய பங்கும் பணியும் வரலாற்றுச்சிறப்புமிக்கவை என்கிறார் முனைவர் சி.சதீஷ்குமரன். (பக்.65-67)
"முதுமுனைவர் வ.அய்.சுப்பிரமணியம் சில நினைவுக்குறிப்புகள்" என்ற கட்டுரையில் தன்னுடைய நேர்காணலை எதிர்கொண்டவிதம் தொடங்கி பல நிகழ்வுகளை வாசகர்களுடன் பரிமாறிக்கொள்கிறார் முனைவர் தி.நெடுஞ்செழியன். (பக்.68-72)
தமிழ்ப் பல்கலைக்கழகத்தில் 16.8.1982இல் தட்டச்சுச்சுருக்கெழுத்தராகப் பணியில் சேர்ந்து, உதவிப்பதிவாளராகப் பணிநிறைவு பெற்றேன். அவருடைய காலத்தில் பெற்ற அலுவலக அனுபவங்களும், ஆய்வின்மீதான ஓர் ஈடுபாடும் பிற்காலத்தில் நான் ஓர் ஆய்வாளரான உருவாகக் காரணமாக அமைந்ததை எண்ணிப் பெருமைப்படுகிறேன். இதழில் வெளியான என்னுடைய கட்டுரை.
தொடர்புக்கு: யாவரும் கேளீர், அங்குசம் சமூக நல அறக்கட்டளை, 16, முதல் மாடி, வில்லியம்ஸ் சாலை, திருச்சிராப்பள்ளி 620 001, மின்னஞ்சல் angusamorg@gmail.com, அலைபேசி 94432 14142, 94888 42045
