18 May 2021

எங்கள் நண்பன் நாகராஜன்

 50 ஆண்டு கால நண்பன் நாகராஜன் உடல்நலக்குறைவின் காரணமாக நேற்றிரவு எங்களை சொல்லொணாத்துயரில் ஆழ்த்திவிட்டு சென்றுவிட்டான். செய்தியை எங்களின் கும்பகோணம் நண்பன் சிற்பக்கலைஞர் ராஜசேகரன் நா தழுதழுக்க கூறியபோது அதிர்ந்துவிட்டேன். அவன் குடும்பத்தாருக்கு எப்படி ஆறுதல் சொல்லித் தேற்றுவது?

மாறாப்புன்னகை, கடின உழைப்பு, அன்பின் உறைவிடம், நட்பின் இலக்கணம், பொறுமையின் சிகரம் என்ற அனைத்திற்கும் பொருத்தமானவன். கும்பகோணத்தில் நானும் அவனும் செல்லாத தெருக்களே இல்லை. நடந்தே போவோம். பேசுவோம், பேசுவோம், பேசிக்கொண்டே இருப்போம். என்ன பேசுவோம்? ஆனால், மனதில் உள்ள சுமை குறைந்ததுபோல இருக்கும். பெரிய நிம்மதி கிடைக்கும்.

கும்பகோணம் மகாமகக்குளக்கரையில், 2016

தஞ்சாவூரில் எங்கள் இல்லத்தில், 2016

கும்பகோணம் செல்வம் இல்லப் புதுமனை புகுவிழாவில், 2017

கும்பகோணம் நண்பர் இல்லத் திருமணத்தில், 2017


கும்பகோணம் கும்பேஸ்வரர் கோயிலில், 2019

நாங்கள் படித்த பள்ளியில் வாயிலில், 2019

கும்பகோணம் ராஜசேகரன் சிற்பக்கூடத்தில், 2021

தாராசுரம் கோயில், கும்பேஸ்வரர் கோயில் பிரகாரம், ராமஸ்வாமி கோயில் பிரகாரம், மகாமகக்குளப்படித்துறை, அவன் வீட்டிற்கருகே உள்ள அம்மன் கோயில் மண்டபம் என்று பல இடங்களில் உட்கார்ந்து பேசிக்கொண்டே இருப்போம். 40 ஆண்டுகளுக்கு முன்பாக உடல் நலக்குறைவால் பாதிக்கப்பட்டு கண்பார்வை இழந்த நிலையிலும் வாழ்வினை மிகவும் இலகுவாக எடுத்துக்கொண்டு வாழ்ந்தவன். பல நிகழ்வுகளில் அவனை நாங்கள் முன்னுதாரணமாக எடுத்துக்கொள்வோம்.

தாராசுரம் அருகே உள்ள மேலச்சத்திரத்திற்குச் செல்லும்போது நாங்கள் செல்லும் முக்கியமான இடம் நாங்கள் தாயாகக் கருதுகின்ற துர்க்கையம்மன் உள்ள பட்டீஸ்வரம் துர்க்கையம்மன் கோயில். அம்மாவைப் பார்க்கப்போகலாமா? என்பான். கிளம்புவோம். நடக்க ஆரம்பிப்போம். வயல் வரப்புகளைப் பார்த்துகொண்டு பேசிக்கொண்டே செல்வோம். கோயிலில் சென்றவுடன் வழக்கமாக துர்க்கையம்மன் அணிந்திருக்கும் புடவையின் வண்ணத்தைக் கேட்பான், கூறுவேன். பிற அலங்காரங்களை ஒவ்வொன்றாகக் கூறுவேன். எங்களைப் பொறுத்தவரை இப்பகுதியில் உள்ளோர் பட்டீஸ்வரம் துர்க்கையை ஒரு கடவுளாக எண்ணிப்பார்ப்பதில்லை. எங்களின் ஏற்றஇறக்கங்களில் துணை நிற்கும் தாயாகவும், உடன் பிறந்த சகோதரியாகவும், நினைக்கிறோம். அத்திருமேனியைப் பார்த்துக் கொண்டே மெய்ம்மறந்து நிற்போம். எங்களின் எண்ணங்கள் ஒரே மாதிரியாகவே இருக்கும். நண்பர்களுடன் நேரில் பேசுவதைப் போல நாங்கள் துர்க்கையம்மனிடம் பேசிவிட்டு மன நிறைவுடன் வெளியே வருவோம். பள்ளிச்சிறுவனாக இருந்த காலம் முதல் இன்று வரை எங்களுக்குத் துணை நிற்பவள் அவளே. அடுத்த முறை பட்டீஸ்வரம் செல்லும்போது துர்க்கையம்மன், ஏன் உன் நண்பனை அழைத்துக்கொண்டு வரவில்லை என்று கேட்பாள் என்று எனக்குத் தெரியும். அது அவளுக்கும் தெரியும்.

கும்பகோணத்தில் சூழல் காரணமாக எங்கள் வீடு விற்ற சங்கடத்தில் நான் இருந்தபோது வாழ்வில் சாதிக்க எவ்வளவோ இருக்கிறது என்று கூறி மன தைரியம் கொடுத்த நண்பர்களில் இவனும் ஒருவன்.

கொரொனா ஊரடங்கிற்கு முன்பாக என் மூத்த மகன் பாரத்துடன்  சென்றிருந்தேன். கடந்த நாள்களை நினைவுகூர்ந்தான். மகிழ்ச்சியோடு பேசினான்.

நண்பனே, நீ என்றுமே எங்கள் நினைவில் நிற்பாய். உன் உழைப்பும், மன தைரியமும் எனக்கு ஒரு பாடமாக என்றும் இருக்கும். 

15 May 2021

2020ஆம் ஆண்டின் சிறந்த சொல் : கொரோனா தீநுண்மி

2020இன் சிறந்த சொற்களை (WOTY/Word of the year) ஆங்கில அகராதிகள் அறிவித்துள்ளன. ஜெர்மனி (1971), ஜப்பான் (1995), ரஷ்யா (2007),  டென்மார்க் (2008), போர்ச்சுக்கல் (2009), நார்வே (2012), உக்ரைன் (2013) உள்ளிட்ட நாடுகள் ஆண்டின் தத்தம் மொழிக்கான சிறந்த சொல்லைத் தெரிவு செய்து அவ்வப்போது அறிவிக்கின்றன. ஜெர்மனியில் ஒவ்வோராண்டும் சொல் தேர்வில் மூன்று நடைமுறைகள் கடைபிடிக்கப்பட்டு வருகின்றன. 1971 முதல் சிறந்த ஜெர்மானியச்சொல்லும் (Word of the Year : Germany), 1991 முதல் பொருத்தமற்ற ஜெர்மானியச் சொல்லும் (Un-word of the Year : Germany), 2008 முதல் இளம் ஜெர்மானியரால் சிறந்த ஆங்கிலச் சொல்லும் (German Youth Word of the Year) தேர்ந்தெடுக்கப்பட்டு வருகின்றன.

ஆக்ஸ்போர்டு அகராதி, 2020ஆம் ஆண்டை ஒரு சொல்லுக்குள் அடக்கிவிடமுடியாது என்றுகூறி எதிர்பாரா ஆண்டின் சொற்களை (Words of an unprecedented year) வெளியிட்டுள்ளது. “க்வாரன்டைன்” (கேம்பிரிட்ஜ்), “பாண்டமிக்” (மெரியம் வெப்ஸ்டர்), “லாக் டவுன்” (காலின்ஸ்) ஆகிய சொற்களை அகராதிகளும், “பான்டெமிக்” என்ற சொல்லை டிஸ்னரி இணைய தளமும், “செல்ப் ஐசோலேஷன்”  என்ற சொல்லை ஆஸ்திரேலிய தேசிய அகராதி மையமும் தெரிவு செய்துள்ளன. 

கொரோனாவின் பரவலும் பாதிப்பும் இப்பூமிப்பந்தில் எந்த அளவு விரவியுள்ளன என்பதை இந்த ஆண்டிற்கான சிறந்த சொற்கள் தெரிவிலிருந்து அறிந்துகொள்ளலாம். கொரோனாவின் கோரத்தாண்டவத்தினால் ஆண்டின் சிறந்த சொற்களாக கொரோனா தொடர்புடைய சொற்களே அகராதிகளாலும், அகராதிகளின் தளங்களாலும் சிறந்த சொற்களாகத் தேர்ந்தெடுக்கப்பட்டுள்ளன. அந்த வகையில் இந்த ஆண்டு தேர்ந்தெடுக்கப்பட்ட சொற்களை ஆண்டின் சிறந்த சொற்கள் என்பதைவிட என்றும் மறக்கவேண்டிய சிறந்த சொற்கள் (Words to be forgotten ever) என்றுகூடச் சொல்லலாம்.

தொடர்ந்து எதிர்கொண்ட மோசமான விளைவுகளைக் குறிக்கின்ற கோவிட்19 என்ற சொல் 2020இல் உருவானது அதனைத் தொடர்ந்து அச்சொல்லுடன் தொடர்புடைய கொரோனா தீநுண்மி, தனிமைப்படுத்தப்படல், சமூக இடைவெளி, முகக்கவசம், தடுப்பூசி போன்ற சொற்கள் அதிகமாக புழக்கத்திற்கு வந்தன. இந்தச் சூழலில் இதுபோன்ற பல நிகழ்வுகளை எதிர்கொண்ட ஆண்டைக் குறிக்கின்ற 2020 என்பதே அனைத்து மொழிகளிலும் இந்த ஆண்டின் சிறந்த சொல்லாகக் கருதப்பட வாய்ப்புண்டு என்றது எக்கனாமிக் டைம்ஸ். 


ஆக்ஸ்போடு அகராதி

இதுவரை ஆண்டின் சிறந்த சொல்லைத் (Word of the year) தெரிவு செய்த ஆக்ஸ்போர்டு அகராதி 2020ஆம் ஆண்டுக்குச் சிறந்த சொல் தெரிவு செய்ய இயலா நிலையைக் குறிப்பிட்டு, ஒரு சொல்லுக்குள் இந்த ஆண்டை அடக்கமுடியாது என்றுகூறி எதிர்பாரா ஆண்டின் சொற்கள் (Words of an unprecedented year) என்ற ஓர் அறிக்கையை வழங்கியுள்ளது. (அதனை முந்தைய பதிவில் படித்தோம்)

கேம்பிரிட்ஜ் அகராதி

கேம்பிரிட்ஜ் அகராதி தேர்ந்தெடுத்த சொல் “க்வாரன்டைன்” (quarantine/ தனிமைப்படுத்துதல்) என்பதாகும்.  கேம்பிரிட்ஜ் அகராதியானது தமக்குக் கிடைத்த புள்ளிவிவரங்களின் அடிப்படையில் தம் அகராதியில் அதிகமாக தேடப்பட்ட சொற்களில் ஒன்றாக க்வாரன்டைன் என்ற சொல் அமைந்ததாகவும், ஆய்வின்போதான தேடலில் பொதுமக்கள் இச் சொல்லைப் பயன்படுத்தியதை நோக்கும்போது தாம் அச்சொல்லிற்கான புதிய பொருள் உருவாவதைக் கண்டறிந்ததாகவும் கூறியுள்ளது. நோய்த்தொற்று ஏற்படாமல் இருக்கவும், நோயினைப் பரவவிடாமல் இருக்கவும் ஒரு குறிப்பிட்ட கால எல்லையளவிற்கு பொதுமக்கள் வீட்டை விட்டு வெளியேறவும், சுதந்திரமாகப் பயணிக்கவும் அனுமதிக்கப்படா நிலை என்ற வகையில் அச்சொல்லுக்கான புதிய பொருள் அமைந்துள்ளதாகவும் நோய்த்தொற்றிலிருந்து தவிர்ப்பதற்காக பொதுமக்கள் வீட்டிலேயே இருந்த நிலையைக் குறிக்கின்ற லாக் டவுன் என்ற சொல்லுக்கு இணையாக இச்சொல் பயன்படுத்தப்பட்டுள்ளதாகவும் அவ்வகராதி கூறியுள்ளது. சொல்லுக்கான கூடுதல் விளக்கமானது தற்போது அகராதியில் இணைக்கப்பட்டுள்ளதாகவும், முன்பு பரவலாக கூறப்பட்டு வந்த பொருளிலிருந்து சற்று மாறுபட்ட நிலையில் அவ்விளக்கம் அமைந்ததாகவும் கூறியுள்ளது.   


மெரியம் வெப்ஸ்டர் அகராதி

மெரியம் வெப்ஸ்டர் அகராதி தேர்ந்தெடுத்த சொல் “பான்டெமிக்” (pandemic/சர்வதேச அளவில் பரவி வருகின்ற தொற்றுநோய்) என்பதாகும். சில சமயங்களில் குறிப்பிட்ட ஒரு சொல்லானது ஒரு சகாப்தத்தையேக் குறிக்கும் வகையில் முக்கியத்துவம் பெறும் என்றும், அந்த வகையில் வழக்கத்திற்கு மாறான இந்த ஆண்டில் தமக்குக் கிடைத்தப் புள்ளிவிவரங்களின்படி ஒரு குறிப்பிட்ட சொல்லே ஆண்டின் சிறந்த சொல்லாகத் தெரிவு செய்யப்பட்டுள்ளதாகவும், அதிக அளவில் தம் இணையதளத்தில் பயன்படுத்தப்பட்ட அந்த சொல் பான்டெமிக் என்றும் அந்த அகராதி கூறியுள்ளது. அமெரிக்காவில் சீட்டில் மருத்துவமனையிலிருந்து முதல் கோவிட்-19 நோயாளி வெளியேறிய 3 பிப்ரவரி 2020ஆம் நாளன்று முதல் இச்சொல்லுக்கான தேடல் அதிகமானது என்றும், அதற்கு முந்தைய ஆண்டு அதே நாளில் தேடப்பட்டதைவிட 1621 விழுக்காடு அதிகமாக தேடப்பட்டதாகவும், இருந்தபோதிலும் முதன்முதலாக கோவிட் பாசிட்டிவ் கொண்ட நோயாளியைப் பற்றிய செய்தி வெளியான 20 ஜனவரி 2020 நாள் முதல் இச்சொல்லின் தேடலானது ஆரம்பமானது என்றும் அவ்வகராதி கூறியுள்ளது.


காலின்ஸ் அகராதி

காலின்ஸ் அகராதி தேர்ந்தெடுத்த சொல் “லாக்டவுன்” (lockdown/பொது முடக்கம்) என்பதாகும். கோவிட்-19 பரவலைத் தடுப்பதற்காக உலகம் முழுவதும் அரசுகளால் எடுக்கப்பட்ட நடவடிக்கைகளில் ஒன்றான ஊரடங்கினை இச்சொல் குறிக்கிறது. நோய்ப் பரவலைத் தடுப்பதற்காக உலகில் கோடிக்கணக்கான மக்கள் ஒட்டுமொத்தமாக எதிர்கொண்ட அனுபவத்தை இச்சொல் குறிக்கிறது என்றும் கடந்த ஆண்டைவிட இந்த ஆண்டில் இச்சொல் அதிகம் தேடப்பட்டதாகவும் இந்த அகராதி கூறுகிறது.

 

டிக்ஷனரி இணையதளம்

டிக்ஷனரி இணையதளமும் “பான்டெமிக்” என்ற சொல்லையே தெரிவு செய்துள்ளது. இச்சொல் இருத்தல்  மற்றும் மனித இருத்தல் தொடர்பானவற்றைக் குறிக்கிறது. 1600களின் இறுதியில் ஒருவரின்/ஒன்றின் இருத்தலுக்கான ஆபத்தை, குறிப்பாக ஓர் இனம் எதிர்கொள்கின்ற பேரழிவினை இச்சொல் குறித்தது. லத்தீன் மொழியில் வினைச்சொல்லான இச்சொல் ஜெர்மன் பெயரைக் கொண்ட, முதன்முதலில் 1919இல் பதிவான,  தத்துவ இயக்கம் என்பதிலிருந்து ஆங்கிலத்திற்கு வந்ததாகும். 2019இல் இருத்தலியல் என்பதானது காலநிலை மாற்றம், துப்பாக்கிக் கலாச்சாரம், ஜனநாயக நிறுவனங்கள் என்ற பரந்துபட்ட அளவில் விவாதிக்கப்பட்டது. பிப்ரவரி 25இல் அமெரிக்க ஜனநாயகக் கட்சியின் ஜனாதிபதி வேட்பாளரான பெர்னி சாண்டர்ஸ் பருவ நிலை மாற்றம் பற்றி விவாதித்தபோது இருத்தலியலுக்கான தேடல் 179 விழுக்காட்டிற்கு உயர்ந்தது. உலகளவில் நடைபெற்ற பருவ நிலை ஆர்ப்பாட்டங்களின்போதும், தன்னுடைய உரைகளின்போதும் செப்டம்பர் 2019இல் சுற்றுச்சூழல் ஆர்வலர் கிரேட்டா தன்பர்க் கூறியதையும் நினைவில் கொள்ளவேண்டும். குறிப்பாக அமெரிக்க காங்கிரசிடம் அவர் தனக்கு ஒரு கனவு உள்ளதாகவும், ஆட்சிப்பொறுப்பில் உள்ளவர்களும், ஊடகங்களும் பருவநிலை ஆபத்தை  இருத்தலியலின் அவசர நிலையாகக் கொண்டு செயல்பட ஆரம்பிக்கவேண்டும் என்று கூறியிருந்தார்.

ஆஸ்திரேலிய தேசிய அகராதி மையம்

ஆஸ்திரேலிய தேசிய அகராதி மையம் இவ்வாண்டின் சிறந்த சொல்லாக “ஐசோ” (Iso: self-isolation/தன்னை தனிமைப்படுத்திக்கொள்ளல்) என்ற சொல்லைத் தேர்ந்தெடுத்துள்ளது. செல்ப் ஐசோலேஷன் என்ற சொல்லின் சுருக்கமாக ஐசோ என்ற சொல் அமைவதாக அந்த மையம் கூறியுள்ளது. பிற அகராதிகளைப் போலவே இந்த சொல்லும் கொரோனா தொடர்புடையாக அமைந்துவிட்டது 

2004 முதல் ஒவ்வோராண்டும் சிறந்த சொல்லை அறிவித்துவருகின்ற ஆக்ஸ்போர்டு அகராதியை 2020ஆம் ஆண்டிற்கான சிறந்த ஒரு சொல்லைத் தெரிவு செய்ய முடியவில்லை என்று அறிவிக்க இட்டுச்செல்லும் நிலைக்குத் தள்ளியுள்ளது கொரோனா. பிற அகராதிகள் கொரோனா தொடர்பான சொற்களையே தேர்ந்தெடுத்துள்ளன. தமிழிலும் ஆண்டின் சிறந்த தமிழ்ச்சொல் தேர்ந்தெடுக்கப்படும் சூழல் அமையும் என்று நம்புவோம். தமிழகக் கல்வி நிறுவனங்கள், அகராதி அமைப்புகள் இதற்கான முன்னெடுப்புகளை மேற்கொள்ளலாம். அவ்வாறு தேர்ந்தெடுக்கப்பட்டால்  2020ஆம் ஆண்டைப் பொறுத்தவரை தமிழில் கொரோனா தீநுண்மி என்ற சொல்லே இந்த ஆண்டின் சிறந்த தமிழ்ச் சொல்லாக அமைய வாய்ப்புள்ளது. போகிற போக்கினைப் பார்க்கும்போது அனைத்து மொழிகளிலும் 2021ஆம் ஆண்டிலும் இச்சொல் இடம் பெற்றுவிடுமோ என்ற ஐயத்தைத் தற்போதைய கொரோனா சூழல் ஆக்கிவிட்டுள்ளது. 

துணை நின்றவை

  • Word of the Year, Wikipedia
  • Word of the Year (Germany), Wikipedia
  • Un-word of the Year (Germany), Wikipedia
  • Not 'pandemic', 'corona' or 'Covid-19', but '2020' could be the word of the year, Economic Times, 10 August 2020
  • Word of the Year 2020, Oxford Languages 2020, Words of an Unprecedented Year
  • Oxford English Dictionary couldn't pick just one 'word of the year' for 2020, CNN, 23 November,2020
  • Cambridge Dictionary’s Word of the Year 2020,  A blog from Cambridge University, Quarantine, 24 November 2020 
  • Merriam-Webster’s Word of the Year 2020, Pandemic 
  • Collins’s Word of the Year 2020 is lockdown

***************************
1993 முதல் மேற்கொள்ளப்பட்டு வருகின்ற சோழ நாட்டில் பௌத்தம் என்ற பொருண்மையிலான என்னுடைய ஆய்வினை நூலாக்கம் செய்யும் முயற்சியில் ஈடுபட்டுவருவதால் வலைப்பூவில் கட்டுரைகள் எழுதுவதிலும், நண்பர்களின் பதிவுகளைப் பார்த்து கருத்தினைப் பதிவதிலும் சற்று சுணக்கம் ஏற்பட்டுள்ளது. நூலாக்கத்திற்குப் பிறகு இவை முன்போலத் தொடரும். நண்பர்கள் அன்புகூர்ந்து பொறுத்துக்கொள்ளவேண்டுகிறேன்.  
***************************