திருவாவடுதுறை ஆதீனம் நடத்திய சைவ சித்தாந்த நேர்முகப் பயிற்சி வகுப்பின் இரண்டாம் தொகுப்பில் (1995-1997) சேர்ந்து சித்தாந்த இரத்தினம் என்னும் சிறப்புப்பட்டத்தைப் பெற்றது நினைவில் நிற்கும் அனுபவம்.
ஆய்வியல் நிறைஞர்ப்பட்ட ஆய்வினை நிறைவு செய்த காலக்கட்டத்தில் சைவ சித்தாந்தம் தொடர்பான ஆர்வம் காரணமாக இவ்வகுப்பில் சேர்ந்தேன். தஞ்சாவூர், (அப்போதைய நகரப் பேருந்து நிலையம் அருகில்) நகராட்சி உயர்நிலைப்பள்ளியில் இவ்வகுப்பு, மாதம் ஒரு ஞாயிற்றுக்கிழமையில் நடைபெற்றது. ஆரம்பத்தில் சில வகுப்புகளைப் பேராசிரியர் ச.சௌரிராஜன் அவர்களும், தொடர்ந்து பேராசிரியர் வீ.ஜெயபால் அவர்களும் ஆசிரியர்களாக இருந்து சிறப்பாக நடத்தினர். சைவம் தொடர்பான பல ஐயங்களைத் தெளிவுபடுத்திக்கொள்ள இவ்வகுப்புகள் துணையாக இருந்தன.
திருவுந்தியார், திருக்களிற்றுப்படியார், உண்மை விளக்கம், சித்தாந்த அட்டகம், சிவஞானபோதம், சிவஞான சித்தியார் பரபக்கம், சிவஞான சித்தியார் சுபக்கம், சைவ சமய வரலாறும் பன்னிரு திருமுறை வரலாறும் என்பன உள்ளிட்ட பல நூல்கள் பாடமாக அமைந்தன. வகுப்புகள் நிறைவு பெற்ற செய்தி (தினகரன், தினமலர், 22.12.1997) நாளிதழ்களில் வெளிவந்தன.
எங்களிடம் தரப்பட்ட தேர்விற்கான வினாத்தாளின் அடிப்படையில் விடைகள் எழுதி மையத்தின் பேராசிரியரிடம் தரப்பட்டன. பிப்ரவரி1998இல் ஆதீனத்தில் நடைபெற்ற நிகழ்வில் சித்தாந்த இரத்தினம் என்ற சிறப்புப்பட்டத்தைப் பெற்றேன்.
சைவ சித்தாந்தப் பயிற்சி மையத்தின் 24ஆம் ஆண்டு நிறைவு விழா மலரில் (10ஆம் தொகுப்பு 2014-2015) வாழ்த்துரை வழங்கும் அரிய வாய்ப்பினைப் பெற்றேன்.
25.1.2025இல் தஞ்சாவூரில் நடைபெற்ற திருவாவடுதுறை ஆதீன சைவ சித்தாந்த நேர்முகப் பயிற்சி மையத்தின் தஞ்சாவூர் மையத்தின் 2025-26ஆம் ஆண்டுத்தொகுப்பிற்கான சைவ சித்தாந்த வகுப்பு தொடக்க விழாவில் வாழ்த்துரை வழங்கும் வாய்ப்பினைப் பெற்றேன். வாய்ப்பு தந்த விழாக்குழுவினருக்கு நன்றி. 1995-97இல் இவ்வகுப்பில் நான் படித்ததைப் பெருமையோடு நினைவுகூர்கிறேன்.
(ஒளிப்படம், வ-இ: தஞ்சாவூர் பில்லுக்காரத்தெரு சக்தி முனியாண்டவர் கோயில் நிர்வாக அறங்காவலர் திரு குரு. சிவசுப்ரமணியன், முனைவர் பா.ஜம்புலிங்கம், தஞ்சாவூர்ப் பெருவுடையார் கோயில் சதயவிழாக்குழுத் தலைவர் திரு து. செல்வம் , ஞானியார் முனைவர் வீ.ஜெயபால்)
‘
-----------------------------------------------------------
நன்றி : திருவாவடுதுறை ஆதீனம்,
திருவாளர்கள் சௌரிராஜன், வீ.ஜெயபால்,
நாளிதழ்கள்
-----------------------------------------------------------
