வாசகர்களை ஈர்க்கும் டேப்ளாய்ட்கள்

பத்திரிகைகள் ப்ராட்ஷீட்  (23.5" x 29.5"), பெர்லினர்  (12.4" x 18.5"), டேப்ளாய்ட்   (11.0" x 16.9"), டேப்ளாய்ட் அளவில் உள்ள காம்பாக்ட் என்ற நான்கு வகைகளில் உள்ளன. ப்ராட்ஷீட் பெரும்பாலும் ஆறு பத்திகளைக் கொண்டிருக்கும். அதற்கென ஒரு பாரம்பரிய முறையைக் கொண்டு ஆழமாகவும், நுணுக்கமாகவும் செய்தியை அணுகும். படித்தவர்கள் மத்தியில் ப்ராட்ஷீட் முக்கியமான இடத்தைப் பெற்றிருக்கும். காம்பேக்ட் என்பது டேப்ளாய்ட் அளவினைப் போன்றதேயாகும். தரம் மற்றும் உயர்நிலை என்ற வகையில் தனித்து வெளிப்படுத்திக் கொள்வதற்காகவும்,  டேப்ளாய்ட் இதழியல் என்பதிலிருந்து சற்றே வேறுபடுத்திக் காண்பித்துக் கொள்வதற்காகவும், டேப்ளாய்ட் இதழியல் என்பதிலிருந்து வேறுபடுத்திக்கொள்ள விரும்புவதாலும் காம்பேக்ட் என்ற சொல் பயன்படுத்தப்படுகிறது.

இவற்றில் டேப்ளாய்டை ப்ராட்ஷீட்டின் பாதி என்பர். இருந்தாலும் இந்த வரன்முறையை முற்றிலும் உண்மை எனக் கூறிவிடமுடியாது. ஏ3 அளவிற்கும் டேப்ளாய்ட் அளவிற்கும் பெரிய வேறுபாடு கிடையாது. ஏ2 தாளில் டேப்ளாய்டை அச்சடிக்கும்போது நாளடைவில் பொருத்தமாகிவிடுகிறது.  நாளிதழ் அளவுகளைக் குறிக்கப்படும் டேப்ளாய்ட், டேப்ளாய்ட் இதழியலையும் குறிக்கிறது.

1880களில் காணப்பட்ட, எளிதாக உட்கொள்ளக்கூடியதாகவுள்ள, தாராளமாகக் கிடைத்த டேப்ளாய்ட் மாத்திரைகளைக் குறிக்கவே முதன்முதலாக இச்சொல் பயன்படுத்தப்பட்டது. அமெரிக்க ஐக்கிய நாடுகள், ரஷ்யா, சீனா, ஐக்கிய நாடுகள், கனடா, ஆஸ்திரேலியா, பிரேசில் உள்ளிட்ட பல நாடுகளில் டேப்ளாய்ட் அளவிலான இதழ்கள் வெளிவருகின்றன.

21ஆம் நூற்றாண்டு டேப்ளாய்டின் நூற்றாண்டு என்று வர்ணிக்கப்படுகிறது. இதழியல் வரலாற்றாளர்கள் டேப்ளாயிடியசம் என்பதானது ஐந்து முக்கியமான சகாப்தங்களைக் கடந்து வந்ததாகக் கருதுகிறார்கள். முதல் சகாப்தமான 19ஆம் நூற்றாண்டின் 30 வருடங்கள்   பென்னி பிரஸ் என்ற நிலையில் மலிவான அச்சு, அச்சுத்துறை மற்றும் அஞ்சல் துறை வளர்ச்சி, பரபரப்பான செய்திகளின் வாசிப்பாளர்கள் என்ற வகையில் அமைந்ததாகும். இரண்டாவது சகாப்தமான 19ஆம் நூற்றாண்டின் இறுதிக்காலங்கள், பத்திரிகை அதிபர்கள் கோலோச்சிய காலமாக அமைந்தது. அக்காலத்தில் புலன் விசாரணையிலான செய்திக்கான முறைகள் கடைபிடிக்கப்பட்டு, பரபரப்புச் செய்திகள் வெளிவர ஆரம்பித்தன. மூன்றாவது சகாப்தமான 20ஆம் நூற்றாண்டின் 20 வருடங்கள், சுதந்திர, கவலையற்ற, ஜாஸ் பண்பாடு பரவிய காலமாகும். வானொலி விரிவடைந்துகொண்டிருந்த இக்காலகட்டத்தில் டேப்ளாய்ட் அச்சிதழின் ஊடாக ஜாஸ் இதழியல் போட்டியிட்டு செய்திகளைக் கொணர ஆரம்பித்தது. நான்காவது சகாப்தமான 20ஆம் நூற்றாண்டின் 70களில், தொலைக்காட்சியின் வரவு இதற்கு ஒரு போட்டியாக அமைந்தது. ஐந்தாவது சகாப்தமான 20ஆம் நூற்றாண்டின் 90கள் மற்றும் 21ஆம் நூற்றாண்டின் ஆரம்பத்தில் அச்சு ஊடகத்தில் மட்டுமின்றி மின்னூடகத்திலும், கணினிமூலமாக தகவல் பெறும் நிலையிலும் டேப்ளாய்ட் பரவலாகப் பேசப்பட ஆரம்பித்தது.

டேப்ளாய்ட் அதன் ஆரம்ப கால நிலையிலிருந்து பல பரிமாணங்களைக் கடந்து, வாழ்வின் ஓர் அங்கமாக மாறி வந்துகொண்டிருக்கிறது. டேப்ளாய்ட் இதழியல், பரபரப்பான அல்லது உணர்வுபூர்வமான செய்திகளைக் கொண்டுவருகின்ற இதழ்களோடு தொடர்புடையது. சுருக்கமான, எளிதாகப் படிக்கக்கூடிய, அதே சமயத்தில் மிகைப்படுத்தப்பட்ட வடிவில் செய்தியைத் தருவதாகும். டேப்ளாய்டில் ஐந்து பத்திகளுக்கு மேல் இருக்காது. நகரங்களில் வாழ்வோர் பேருந்தில் செல்லும்போது எடுத்துச்செல்லவோ, படிக்கவோ எளிதாக இருப்பதால் இதனைப் படிக்க ஆரம்பித்தனர்.

அமெரிக்காவில் 1970களில் பெரும்பாலான டேப்ளாய்டுகள், வார இதழ்களாயின. அமெரிக்காவின் குறிப்பிடத்தக்க ப்ராட்ஷீட்களாக தி நியூயார்க் டைம்ஸ், தி வாஷிங்டன் போஸ்ட், தி வால் ஸ்ட்ரீட் போன்ற ப்ராட்ஷீட் இதழ்களைக் கூறலாம். அச்சு விலையேற்றம் காரணமாக பல ப்ராட்ஷீட் இதழ்கள் தம் அளவினை குறைக்க ஆரம்பித்தன. 2008இல் தி நியூயார்க் டைம்ஸ் இதழும், தொடர்ந்து தி லாஸ் ஏஞ்சல்ஸ் டைம்ஸ், தி வாஷிங்டன் போஸ்ட் ஆகிய இதழ்களும்  அளவினைக் குறைத்தன.  பின்னர் அதன் நடையும், தரமும் மாறி அனைவரையும் ஈர்க்கும் வகையில் அமைய ஆரம்பித்துவிட்டன. குறிப்பாக 2000க்குப் பிறகு பெரும்பாலான இதழ்கள் வாசிக்க எளிதாக அமைவதாகக்கூறி, டேப்ளாய்ட் வடிவிற்கு மாற ஆரம்பித்துள்ளன.

நியூயார்க் வேர்ல்ட் இதழின் பதிப்பகத்தாரான ஜோசப் புலிட்சர், இலண்டனிலிருந்து வெளியாகும் டெய்லி மெயில் இதழின் நிறுவனரான ஹாம்ஸ்வொர்த் என்பவரை அழைத்து அவ்விதழை ஒரு நாளைக்கு வடிவமைத்துத் தரும்படி கூற, வழக்கமான பத்திரிகைக்கு மாறாக, அதன் பாதி அளவில் அவர் வடிவமைத்த இதழ் ஜனவரி 1, 1901இல் வெளியானது.

அப்போது அது 20ஆம் நூற்றாண்டின் பத்திரிகைள் என்று வர்ணிக்கப்பட்டது. இதழை வடிவமைத்தபோது அவர், அளவிற்கு முக்கியத்துவம் தராமல், சரியான முறையில் முழுமையாக அச்சிடும் இடத்தைப் பயன்படுத்தல் என்பதை இலக்காகக் கொண்டு, சிறிய அளவிலான கட்டுரைகள், சிறிய பத்திகள், எளிதான சொற்றொடர்களைக் கொண்டு அவ்விதழை அமைத்திருந்தார். 1903இல் அவர் இலண்டனில் டெய்லி மிர்ரர் என்ற டேப்ளாய்டை ஆரம்பித்தார். டேப்ளாய்டில் காணப்படுகின்ற சிகப்பு முகப்புப்பட்டையினை அவ்விதழில் காணலாம். அதில் குற்றச்செய்திகள், மனித சோகங்கள், பிரபலங்களின் கிசுகிசுக்கள், விளையாட்டு, நகைச்சுவை, புதிர் போன்றவற்றுடன் அதிக எண்ணிக்கையில் புகைப்படங்கள் இடம்பெற்றிருந்தன. அக்காலகட்டத்தில் டெய்லி ஸ்கெட்ச் மற்றும் டெய்லி கிராபிக் இதழ்கள் அவருடைய இந்த உத்தியைப் பயன்படுத்த ஆரம்பித்தன. 

20ஆம் நூற்றாண்டின் இறுதியிலும், 21ஆம் நூற்றாண்டின் ஆரம்பத்திலும் இலண்டனின் பெரும்பாலான ப்ராட்ஷீட் இதழ்களான தி இன்டிபெண்டன்ட், தி டைம்ஸ், தி ஸ்காட்ஸ்மேன் போன்றவை அளவைச் சுருக்கி காம்பேக்ட்டிற்கு மாறின.  இலண்டனில் டெய்லி எக்ஸ்பிரஸ், டெய்லி மிர்ரர், டெய்லி ஸ்டார், டெய்லி மெயில், சன், தி மெயில் ஆன் சன்டே (ஞாயிறு),  சன்டே எக்ஸ்பிரஸ் (ஞாயிறு) ஆகியவை டேப்ளாய்ட் வடிவில் வெளிவருகின்றன. 

தி மான்செஸ்டர் கார்டியன் என்ற பெயரில் வெளிவந்து, பின்னர் பெயர் மாற்றம் பெற்ற கார்டியன் இதழ் ப்ராட்ஷீட் (1821-2005), பெர்லினர் (2005-2018) இதழில் வெளியாகி 2018 முதல் டேப்ளாய்ட்டாக அல்லது வெளியாகிறது.

மாறாக ஐரோப்பாவின் மிகப்புகழ் பெற்ற ஜெர்மன் டேப்ளாய்டான பில்ட் வழக்கமான டேப்ளாய்டைவிட சற்றுப் பெரிதாக அதே சமயத்தில் ப்ராட்ஷீட்டைவிட சற்றுச் சிறிதாக அச்சிடப்பட்டது. அதிக எண்ணிக்கையில் விற்பனையாகின்ற அவ்விதழ் அளவில் ப்ராட்ஷீட், நடையில் டேப்ளாய்ட் என்ற பெயரைப் பெற்றதாகும். ஜெர்மானிய மொழியில் பில்ட் என்றால் படங்களைக் குறிக்கும். புகைப்படங்களை அதிகம் கொண்டிருந்ததால், அதற்கு அப்பெயர் சூட்டப்பட்டது.

பிரிட்டனில் டேப்ளாய்டுகள் முகப்புப்பக்கத்தில் சிகப்பு வண்ணப்பட்டையைக் கொண்டிருக்கும். அமெரிக்க டேப்ளாய்டுகளைவிடவும் அவை அதிக அளவிலான உணர்வுபூர்வ செய்திகளையும் கொண்டிருக்கும். இதன் காரணமாக பல பிரச்னைகள் தோன்ற ஆரம்பித்து, இலண்டனில் இது தொடர்பாக சில விதிமுறைகளை நிர்ணயிக்கப்பட்டன.

இந்தியாவில் வெளிவருகின்ற பத்திரிகைகள் பெரும்பாலும் ப்ராட்ஷீட் அளவில் வெளிவருகின்றன. 1941 முதல் வெளிவந்த பிளிட்ஸ் இந்தியாவிலிருந்து வெளிவந்த முதல் டேப்ளாய்ட் என்ற பெருமையினைப் பெற்றது. ஆங்கிலம், இந்தி, உருது, மராத்தி ஆகிய மொழிகளில் வெளிவந்த அவ்விதழ்  1990களின் இடையில் நின்றுவிட்டது.

இந்தியாவிலிருந்து டேப்ளாய்டாக வெளிவந்த/வெளிவருகின்ற இதழ்கள் தி ஆஃடர்னூன் டிஸ்பேச் கூரியர், (ஆங்கில நாளிதழ், மும்பை, 1985 முதல்), எபேலா (பெங்காளி நாளிதழ், கொல்கத்தா, 2018 வரை), கேரள கௌமாண்டி (மலையாள மாலை நாளிதழ், 2006 முதல்), ராஷ்ட்ர தீபிகா (மலையாள மாலை நாளிதழ், 1992 முதல்), பிரபஞ்சன் சாங்கட் (உருது நாளிதழ், ஆக்ரா, 2008 முதல்), நியூடெல்லி டைம்ஸ் (ஆங்கில வார இதழ், புதுதில்லி, 1991 முதல்), மெட்ரோ நவ் (ஆங்கில காலை நாளிதழ், 2006-2009) என்பனவாகும். இந்தியாவில் முதன்முதலாக பெர்லினர் அளவில் வெளியான இதழ் மிண்ட் (ஆங்கில நாளிதழ், புதுதில்லி, 2007), 2016இல் ப்ராட்ஷீட்டாக மாறியது.

தமிழகத்தில் தற்பொழுது வாசிக்கப்படுகின்ற நாளிதழ்கள் பெரும்பாலும் ப்ராட்ஷீட் வகையைச் சார்ந்ததாகும்.  தினமணி இதழின் அளவு தோராயமாக 21.0" x 26.5" ஆகும். தமிழகத்தில் சிறப்பு நிகழ்வுகளின்போது சில இதழ்கள் டேப்ளாய்ட் அளவிலான இணைப்பினை வெளியிடுகின்றன. ஆனந்த விகடன் வார இதழ், சில ஆண்டுகளுக்கு முன் சகோதரப்பதிப்பாக ஜுனியர் போஸ்ட் என்ற இதழை டேப்ளாய்ட்டில் வெளியிட்டது.

எங்கள் தாத்தா ஜ. ரத்தினசாமி, நவசக்தி நாளிதழ் மற்றும் போல்ஸ்டார் நாளிதழ்களின் வாசகர் ஆவார். 1960களில் அவ்விதழ்களைப் பார்த்ததும், அவற்றுள் டேப்ளாய்ட் அளவில் வெளியான போல்ஸ்டார் நாத்திகம் இராமசாமியை ஆசிரியராகக் கொண்டு வெளிவந்ததாகவும் நினைவு.

வாசகர்கள் இலவச இணையதளத்தின் பக்கம் திரும்ப ஆரம்பித்துவிட்டதால் அண்மைக்காலமாக ப்ராட்ஷீட்டாகட்டும், டேப்ளாய்ட்டாகட்டும் இரண்டுமே கடினமான சூழலை எதிர்கொள்ள ஆரம்பித்துள்ளன. இணைய வசதி எளிதில் கிடைக்கின்ற நிலையில் மிக விரைவில் ப்ராட்ஷீட் பத்திரிகைகள், டேப்ளாய்ட் அளவில் இணையத்தில் படிக்க வாய்ப்புகள் பெருக ஆரம்பித்துள்ளன. இணைய தளங்களில் ப்ராட்ஷீட், கிட்டத்தட்ட டேப்ளாய்ட் அளவிற்கே மாற ஆரம்பித்துவிட்டது எனலாம். அச்சிதழைவிட இணைய இதழ் கண்ணைக் கவரும் வகையில் தலைப்புச் செய்திகள், பார்க்க ஆவலைத்தூண்டுகின்ற வண்ணங்கள், வரைபடங்கள் ஆகியவற்றைக் கொண்டு வெளிவர ஆரம்பித்துள்ளன. உதாரணமாக தி நியூயார்க் டைம்ஸ் இதழின் இணைய இதழ் நான்கு பத்திகளைக் கொண்டு, கிட்டத்தட்ட டேப்ளாய்ட்டைப் போலவே காட்சியளிக்கிறது. இரண்டாவது பத்தியானது மற்ற மூன்று பத்திகளைவிடவும் சற்றே அகலமாக இருக்கிறது. அந்த வகையில் நோக்கும்போது ப்ராட்ஷீட் நிலையிலான ஆழ்ந்த, பரந்த வாசிப்பு என்பதானது குறைய ஆரம்பித்து, டேப்ளாய்ட்டின் பக்கம் அனைவரும் திரும்பிப்பார்க்கின்ற நேரம் வந்துவிட்டது எனலாம்.

பரபரப்பான, உணர்வுபூர்வமான செய்திகளைத் தருகின்ற இதழியல் என்ற நிலையிலிருந்து மாறி அனைவரும் படிக்கும் வகையிலான செய்திகளைக் கொண்டு வருகின்ற இதழ், வாசிக்கவும் கையாளவும் எளிதான இதழ் என்ற வகையில் தற்போது டேப்ளாய்ட் இதழியலின் பயணம் தொடர்கிறது. போதிய விளம்பரம் இன்மை, அதிகமாக விற்பனையாகா நிலை போன்றவற்றின் காரணமாக அச்சு இதழிலிருந்து இணைய இதழிற்கான மாற்றம் வந்துவிட்ட நிலையில் மிக விரைவில் தமிழ்ப் பத்திரிகைகளும் காம்பேக்ட்டிலிருந்து டேப்ளாய்டுக்கு மாற அதிகமான வாய்ப்புகள் உள்ளன, அச்சு வடிவில் மட்டுமன்றி, இணைய இதழாகவும்.   

நன்றி : தினமணி, வாசகர்களை ஈர்க்கும் டேப்ளாய்ட்கள், 11 ஜுன் 2020

2019ஆம் ஆண்டின் சிறந்த சொற்கள்-அகராதிகளின் தெரிவு: தினமணி

2019ஆம் ஆண்டின் சிறந்த சொற்கள்-அகராதிகளின் தெரிவு என்ற தலைப்பில் என்னுடைய கட்டுரை தினமணி  தளத்தில் (11 மே 2020) வெளியாகியுள்ளது. அதனைப் பகிர்வதில் மகிழ்கிறேன், தினமணி இதழுக்கு நன்றியுடன்.

2019இன் சிறந்த ஆங்கிலச்சொற்களாக கிளைமேட் எமர்ஜென்சி (ஆக்ஸ்போர்டு), அப்சைக்கிளிங் (கேம்பிரிட்ஜ்), தே (மெரியம் வெப்ஸ்டர்), கிளைமேட் ஸ்ட்ரைக் (காலின்ஸ்) ஆகிய சொற்களை அகராதிகளும், எக்சிஸ்டென்சியல் என்ற சொல்லை டிஸ்னரி இணைய தளமும் தெரிவு செய்துள்ளன.  சம்விதான் என்ற சொல்லை சிறந்த இந்தி சொல்லாக ஆக்ஸ்போர்டு அகராதி தேர்ந்தெடுத்துள்ளது. 2019க்கான சிறந்த ஆங்கிலச் சொற்கள் தெரிவு செய்ததற்கான பின்புலத்தினைப் பற்றி அந்த அகராதிகள்  கூறுவதைக் காண்போம்.   

ஆக்ஸ்போர்டு அகராதி தேர்ந்தெடுத்த சொல் “கிளைமேட் எமர்ஜென்சி” (climate emergency/கால நிலை அவசர நிலை) என்பதாகும். இச்சொல்லின் பயன்பாடு பல நூறு மடங்கு (10,796 விழுக்காடு) உயர்ந்ததோடு, தற்போதுள்ள அவசர நிலையை வெளிப்படுத்துவதாகவும், இந்த ஆண்டில் கால நிலை என்ற சொல் அவசரம் என்பதோடு இணைந்து, ஆரோக்கிய அவசரம் என்பதைவிட மூன்று பங்கு பயன்படுத்தப்பட்டுள்ளது. 2019இல் நூற்றுக்கணக்கான நகரங்களும், நாடுகளும் பருவநிலை அவசர நிலையை அறிவித்துள்ளன. இச்சொல் கால நிலை நெருக்கடி, கால நிலை நடவடிக்கை, கால நிலை மறுப்பு, அழிவு, புவி வெப்பமயமாதல் போன்ற சொற்களுடன் போட்டியிட்டு முதலிடத்தைப் பெற்றுள்ளது. பருவ மாற்றத்தைக் குறைக்கவோ கட்டுப்படுத்தவோ, அதனால் விளைகின்ற சுற்றுச்சூழல் தாக்கத்தைத் தவிர்க்கவோ எடுக்கப்படுகின்ற நடவடிக்கையை இது குறிக்கிறது. ஐக்கிய நாடுகள் செயலர் இதனை இக்காலகட்ட முக்கியமான பிரச்னை என்று கூறியுள்ளார். இச்சொல் பற்றிய விவாதத்தோடு மட்டுமன்றி, அதிகமான செயல்பாடுகளும் பரவலாகக் காணப்படுகின்றன. 2019இல் அதிகம் பயன்படுத்தப்பட்ட சொல்லாக ஆக்ஸ்போர்டு கார்பஸ் தொகுப்பிலும் காணப்பட்டது. 2018ஐவிட 2019இல், செப்டம்பர் 2019 வரை இதன் பயன்பாடானது 100 விழுக்காடு அதிகரித்துள்ளது. இந்த வகையில் தான் எமர்சென்ஜி என்ற சொல் முக்கியத்துவம் பெறுகிறது.

சம்விதான் என்ற இந்திச்சொல்லை இந்த ஆண்டின் சிறந்த சொல்லாக இவ்வகராதி தேர்ந்தெடுத்தது. சம்விதான் என்றால் அரசியல் அமைப்பு என்று பொருளாகும்.

கேம்பிரிட்ஜ் அகராதி தேர்ந்தெடுத்த சொல் “அப்சைக்ளிங்” (upcycling/மறுசுழற்சி) என்பதாகும். பழைய அல்லது பயன்படுத்தப்பட்ட பொருள்களைக் கொண்டு உருவாக்குகின்ற புதிய தளவாடங்களையோ பொருள்களையோ உருவாக்குவதைக் குறிக்கின்ற இச்சொல் இவ்வகராதியின் இன்ஸ்டாகிராம் ரசிகர்களின் தேர்வு அடிப்படையில் தெரிவு செய்யப்பட்டது. 4 ஜுலை 2019ஆம் நாளன்று பகிரப்படும்போது மற்ற சொற்களைவிட இதற்கு அதிகமான ஆதரவு கிடைத்தது. வாசகர்கள் இதனை ஒரு சொல்லாகக் கருதுவதோடு மட்டுமன்றி, அதனை ஒரு நேர்மறை உத்தியாகவே கருதுகின்றனர் என்கிறார் இவ்வகராதியின் பதிப்பக மேலாளர். ஒரு தனிப்பட்ட நபரால் மேற்கொள்ளப்படுகின்ற உறுதியான செயல்பாடான அப்சைக்ளிங், ஒரு வேறுபாட்டையே உண்டாக்குகிறது என்கிறார் அவர். 2011 டிசம்பரிலிருந்து இச்சொல்லின் பயன்பாடானது 181 விழுக்காடு அதிகரித்துவிட்டதாகவும் கடந்த ஆண்டு மட்டும் இச்சொல்லுக்கான தேடல் இரு மடங்காகிவிட்டது என்றும் அவர் கூறுகிறார்.

மெரியம் வெப்ஸ்டர் அகராதி தேர்ந்தெடுத்த சொல் “தே” (they/அவர்கள்) என்பதாகும். நபர்களின் அல்லது பொருள்களின் பெயருக்குப் பதிலாக வருகின்ற பிரதி பெயர்ச்சொல் அல்லது சுட்டுப்பெயர்ச்சொல் தற்போது முக்கியமான இடத்தைப் பெறுகிறது. பொதுவாக செய்திகளில் கையாளப்படுவதன் அடிப்படையில் சொற்கள் தேர்ந்தெடுக்கப்பட்டாலும்கூட மொழியின் அடிப்படையில் நோக்கும்போது அகராதி என்பதானது ஒரு முதன்மை ஆதாரமாக அமைந்துவிடுகிறது. கடந்த ஆண்டைக்காட்டிலும் 2019இல் இச்சொல்லுக்கான தேடல் 313 விழுக்காடு உயர்ந்துள்ளது. கடந்த 600 ஆண்டுகளாக அவர்கள்/அவைகள் என்ற சொல் பயன்பாட்டில் இருந்து வந்துள்ளது. அண்மைக்காலமாக ஒரு நபரைக் குறிக்க பயன்படுத்தப்படும் இச்சொல் ஆங்கில மொழியில் பரவலாக நிறுவப்பட்ட நிலையில் அகராதியில் இணைக்கப்பட்டது.  இச்சொல்லை ஏப்ரல் 2019இல் வாஷிங்டன் மாநில இந்திய அமெரிக்க, அமெரிக்கக் கீழவை உறுப்பினரான பிரமிளா ஜெயபால் தன் குழந்தையின் பாலினத்தைப் பற்றிக் குறிப்பிடும்போதும், செப்டம்பர் 2019இல்  ஆங்கிலப் பாடகரான சாம் ஸ்மித் தனிப்பட்ட சுட்டுப்பெயரைக் குறிப்பிடும்போதும் பயன்படுத்தினர். அமெரிக்க உளவியல் சங்கத்தின் வலைப்பூ  அலுவல்பூர்வமாக அவன்/அவள் என்பதற்கு பதிலாக அவர்கள் என்ற சொல்லைப் பயன்படுத்தலாம் என்று பரிந்துரைத்துள்ளது. 

காலின்ஸ் அகராதி தேர்ந்தெடுத்த சொல் “கிளைமேட் ஸ்ட்ரைக்” (climate strike/கால நிலை வேலை நிறுத்தம்) என்பதாகும். பருவ நிலை வேலை நிறுத்தம் என்பது கடந்த ஓராண்டுக்கு முன்னர் சுற்றுச்சூழல் ஆர்வலரான கிரேட்டா தன்பர்க்கால் மேற்கொள்ளப்பட்ட உலகளாவிய இயக்கமாகப் பரவ ஆரம்பித்த, ஒரு விதமான எதிர்ப்பாகும். முதன்முதலாக இச்சொல் நவம்பர் 2015இல் பாரிஸில் ஐக்கிய நாடுகள் சவையின் பருவ நிலை மாற்ற மாநாடு நடைபெற்ற காலகட்டத்தில் முதல் நிகழ்வு நடைபெற்றபோது பதிவானது. அடுத்த ஓராண்டிற்குள் உலகம் முழுவதும் பருவ நிலை ஆர்ப்பாட்டம் பரவ ஆரம்பித்து, உலகின் பெரிய நகரங்கள்அதன் தாக்கத்தை உணர ஆரம்பித்தன. 2013இல் பிபிசி நடத்திய ப்ளூ ப்ளானட் இரண்டாம் பகுதியில் பருவ நிலை தொடர்பான செய்திகளையும், புகைப்படங்களையும் ரசிகர்கள் பார்க்க ஆரம்பித்தபின்னர் நான்கு மடங்கு அதிகரிக்க ஆரம்பித்த இச்சொல்லின் பயன்பாடானது, 2019இல் 100 மடங்கு உயர்ந்துவிட்டதாக காலின்ஸ் அகராதியின் அகராதியியலாளர்கள் கூறுகின்றார்கள்.

டிஸ்னரி இணையதளம் தேர்ந்தெடுத்த சொல் “இருத்தலியல்” (existential /இருத்தலியல்) என்பதாகும். இச்சொல் இருத்தல்  மற்றும் மனித இருத்தல் தொடர்பானவற்றைக் குறிக்கிறது. 1600களின் இறுதியில் ஒருவரின்/ஒன்றின் இருத்தலுக்கான ஆபத்தை, குறிப்பாக ஓர் இனம் எதிர்கொள்கின்ற பேரழிவினை இச்சொல் குறித்தது. லத்தீன் மொழியில் வினைச்சொல்லான இச்சொல் ஜெர்மன் பெயரைக் கொண்ட, முதன்முதலில் 1919இல் பதிவான,  தத்துவ இயக்கம் என்பதிலிருந்து ஆங்கிலத்திற்கு வந்ததாகும். 2019இல் இருத்தலியல் என்பதானது காலநிலை மாற்றம், துப்பாக்கிக் கலாச்சாரம், ஜனநாயக நிறுவனங்கள் என்ற பரந்துபட்ட அளவில் விவாதிக்கப்பட்டது. பிப்ரவரி 25இல் அமெரிக்க ஜனநாயகக் கட்சியின் ஜனாதிபதி வேட்பாளரான பெர்னி சாண்டர்ஸ் பருவ நிலை மாற்றம் பற்றி விவாதித்தபோது இருத்தலியலுக்கான தேடல் 179 விழுக்காட்டிற்கு உயர்ந்தது. உலகளவில் நடைபெற்ற பருவ நிலை ஆர்ப்பாட்டங்களின்போதும், தன்னுடைய உரைகளின்போதும் செப்டம்பர் 2019இல் சுற்றுச்சூழல் ஆர்வலர் கிரேட்டா தன்பர்க் கூறியதையும் நினைவில் கொள்ளவேண்டும். குறிப்பாக அமெரிக்க காங்கிரசிடம் அவர் தனக்கு ஒரு கனவு உள்ளதாகவும், ஆட்சிப்பொறுப்பில் உள்ளவர்களும், ஊடகங்களும் பருவநிலை ஆபத்தை  இருத்தலியலின் அவசர நிலையாகக் கொண்டு செயல்பட ஆரம்பிக்கவேண்டும் என்று கூறியிருந்தார்.

ஒவ்வோராண்டும் ஆங்கில அகராதிகள் ஆண்டின் சிறந்த ஆங்கிலச் சொல்லாக ஆங்கிலச் சொற்களைத் தேர்ந்தெடுத்து வருகின்றன. ஆக்ஸ்போர்டு அகராதி கடந்த சில ஆண்டுகளாக ஆண்டின் சிறந்த இந்தி சொல்லைத் தேர்ந்தெடுத்து வருகிறது. இவ்வாறாக தமிழிலும் ஆண்டின் சிறந்த தமிழ்ச்சொல் தேர்ந்தெடுக்கப்படும் சூழல் அமையும் என்று நம்புவோம். தமிழகக் கல்வி நிறுவனங்கள், அகராதி அமைப்புகள் இதற்கான முன்னெடுப்புகளை மேற்கொள்ளலாம்.

துணை நின்றவை

Oxford Dictionary, Word of the Year 2019

Cambridge Dictionary announces ‘upcycling’ as World of the Year 2019

Merriam Webster, Word of the Year 2019

The Collins word of the year 2019 is climate strike  

Dictionary.com’s Word Of The Year 2019 For 2019 Is….

‘Samvidhaan’ announced as Oxford Hindi Word of the Year 2019

முந்தைய பதிவுகள்
2018இன் சிறந்த சொல்
2018இன் சிறந்த இந்தி சொல்
2017ன் சிறந்த சொல், தி இந்து, 7 ஜனவரி 2018
தமிழில் இந்த ஆண்டின் சிறந்த சொல் எது?  (2013) தி இந்து, 12 ஜனவரி 2014

உலகின் இளம் பெண் பிரதமர் சன்னா மரின் : தினமணி

உலகின் இளம் பெண் பிரதமர் சன்னா மரின் என்ற தலைப்பில் என்னுடைய கட்டுரை தினமணி  தளத்தில் இன்று (8.3.2020) வெளியாகியுள்ளது. அதனைப் பகிர்வதில் மகிழ்கிறேன், தினமணி இதழுக்கு நன்றியுடன்.

உலகைத் தன் பக்கம் திரும்பிப்பார்க்க வைத்த பெண்மணியாக அண்மைக் காலமாகப் பேசப்பட்டு வருபவர், அரசியலுக்கு வந்து ஏழே ஆண்டுகளில் பின்லாந்தின் பிரதமர் ஆன,  இளம் வயதில் பெண் பிரதமர் என்ற சிறப்பைப் பெற்ற, சன்னா மரின் (34) ஆவார். இவருக்கு முன்பாக நியூசிலாந்தின் பிரதமரான ஜெசிந்தா அர்டேர்ன் குறைந்த வயதில் பிரதமர் ஆனவர்.  

ஐரோப்பிய நாடுகளில் ஒன்றான பின்லாந்தில் சமூக ஜனநாயகக் கட்சியின் தலைமையில் ஐந்து கட்சிக்கூட்டணி ஆட்சி நடத்தியபோது ஆண்டி ரின்னி பிரதமராக இருந்தார். அப்போதைய தபால்துறை வேலை நிறுத்தத்தை ஆண்டி ரின்னி முறையாக எதிர்கொள்ளாததால் கூட்டணிக் கட்சியினர் எதிர்ப்பைத் தெரிவிக்க, பதவியை ராஜினாமா செய்தார். தொடர்ந்து, போக்குவரத்துத் துறை அமைச்சராக இருந்த அதே கட்சியைச் சேர்ந்த, சன்னா மரின் பிரதமரானார்.

பல பிரச்னைகளை பின்லாந்து எதிர்கொண்டிருந்த சூழலில் பொறுப்பில் அமர்ந்தார் சன்னா மரின்.  நிதியமைச்சரான கத்ரி குல்முனி (32) அவரைவிட இளையவர். ஐந்து கட்சிக் கூட்டணியில் இவரது கட்சியில் இடம்பெற்ற நால்வரில் ஒருவர் குல்முனி.  நால்வரில் ஒருவரே 35 வயதுக்கு மேலுள்ளவர். இந்த நியமனங்களைப் பற்றி ஓர் அரசியல் ஊடகவியலாளர், “மக்களின் தேவைக்கு எந்நேரமும் பணி செய்கின்ற இளம் வயதினர்தான் தற்போதைய தேவை என்றும், அவ்வாறு அமைபவர்கள் குறிப்பாக மிகவும் புதியவர்களாக இருப்பின் இன்னும் சிறப்பு” என்றும் கூறினார்.  

குடும்ப சூழல் அவர் பக்குவப்படக் காரணமானது. இளம் வயதில் பிரிந்த பெற்றோர்களைக் கொண்ட அவர், தாயாரால் வளர்க்கப்பட்டார். அவரது குடும்பம் பொருளாதாரப் பிரச்சனைகளை எதிர்கொள்ள வேண்டியிருந்தது. 15ஆம் வயதில் பேக்கரி கடையில் பணியாற்றினார். பள்ளிக்காலத்தில் தன்னுடைய கைச்செலவிற்காக பருவ இதழ்களை விநியோகம் செய்தார். ஒரே பாலினத்தைச் சேர்ந்தவராக தன் தாயார் இருந்ததால் பல இக்கட்டான சூழல்களை எதிர்கொண்டதாகவும், தன் குடும்பத்தைப் பற்றி மனம் திறந்து யாரிடமும் பேச இயலா நிலையில் இருந்ததாகவும் ஒரு பேட்டியில் கூறியிருந்தார். அவருக்கு முழுக்க முழுக்க ஆதரவாக இருந்தது அவருடைய தாயார் ஆவார். விரும்பியதை சாதிக்கமுடியும் என்ற ஒரு ஊக்கத்தை அவர் தன் மகளுக்குத் தந்திருந்தார். அவர்களுடைய குடும்பத்தில் உயர்நிலைப்பள்ளிப் படிப்பினை நிறைவு செய்து பல்கலைக்கழகத்திற்குச் சென்றவர் சன்னா மரின் ஆவார்.  

அவருடைய அரசியல் வளர்ச்சியானது மிகவும் குறுகிய காலத்திற்குள் அமைந்ததாகும். 20ஆம் வயதில் அரசியலில் பிரவேசித்த அவர், ஹெல்சின்கியின் வட பகுதியில் இருந்த டாம்பீயர் என்ற ஊரில் உள்ளூர் சபைக்கான தேர்தலில் போட்டியிட்டார். ஆனால் தேர்ந்தெடுக்கப்படவில்லை. இருந்தபோதிலும் அடுத்த ஐந்து ஆண்டிற்குள் வெற்றி பெற்றதோடு சபையின் தலைவராக 27ஆம் வயதில் தேர்ந்தெடுக்கப்பட்டார்.  2015இல் பின்லாந்தின் முக்கிய அரசியல் கட்சியின் நாடாளுமன்ற உறுப்பினரானார். முதன் முதலாக பாராளுமன்றத்தில் அடியெடுத்துவைத்தது முதல் இவர் ஒரு நம்பிக்கைக்கீற்றாகத் திகழ்ந்து வருகிறார்.

பதவியேற்றபோது, 22 மாதக்குழந்தையின் தாயாக இருந்த அவர், இப்பணிக்கு அவர் பொருத்தம்தானா என்ற வகையில் எழுப்பப்பட்ட வினாக்களைப் பற்றி கவலை கொள்ளவே இல்லை. நிர்வாகத்தில் கவனம் செலுத்துவதே தற்போதைய தேவை என்று உறுதியாகக் கூறினார். இடதுசாரிக் கொள்கையைக் கொண்டிருந்த அவர் பின்லாந்து நாடு வளம் பெற்ற நாடாக அமைய இலக்கு அமைத்தார். பிரதமராகத் தேர்ந்தெடுக்கப்பட்ட பின்னர் அவர், "என் வயதைப் பற்றியோ, பாலினத்தைப் பற்றியோ எனக்கு என்றும் சிந்தனை கிடையாது. அரசியலில் நான் வெற்றி பெறுவதற்குக் காரணம் மக்கள் என்மீது கொண்டுள்ள நம்பிக்கை என்பதை நான் அறிவேன்," என்று கூறினார்.

பின்லாந்தின் மூன்றாவது பெண் பிரதமரான இவர், “பின்லாந்து தன்னை முன்னிலைப்படுத்திக்கொள்ள இது ஒரு நல்ல வாய்ப்பு என்று நினைக்கிறேன். அதற்காக நான் நன்றிக்கடன் பட்டுள்ளேன். அனைவருமே எதிர்கொள்ளவேண்டிய பிரச்னைகளுக்கு முன்னுரிமை கொடுக்க வேண்டிய நேரம் இது. தனி நபருக்கு அல்ல” என்றார். பிரதமராக ஆக வேண்டும் என்று தான் கனவு காணவில்லை என்றும், அதனைக் கற்பனை செய்துகூட பார்க்கவில்லை என்றும், அரசியல்வாதிகளும், அரசியலும் அவரைப் பொறுத்தவரை வெகுதூரத்தில் இருந்ததாகவும் கூறினார்.

“நான் சமுதாயத்தை எப்படி நோக்குகிறேன் என்பதை நான் வளர்ந்த சூழல் தீர்மானித்தது. எதிர்காலம் நோக்கியுள்ள பெரிய பிரச்னைகளுக்கு மூத்த தலைமுறையினர் தீர்வு காணாததே நான் இப்போது அரசியல் களத்தில் இருப்பதற்குக் காரணம். நான் செயல்பட வேண்டிய உடனடித்தேவை உள்ளது. இது மற்றவருடைய பணி என்று ஒதுக்கிவிட என் மனம் ஒப்பவில்லை” என்றும், “அனைத்து மகளிருக்கும் வாக்களிக்கும் உரிமையை வழங்கிய ஐரோப்பாவின் முதல் நாடு என்ற பெருமையுடையது பின்லாந்து” என்றும் கூறினார். 1907இல், உலகில் முதன்முதலாக பெண்களை நாடாளுமன்றத்திற்கு அனுப்பிய பின்லாந்தில் தற்போது முக்கியமான பொறுப்புகளில் அதிகமான இடங்களில் பெண்கள் இடம் பெற்றுள்ளனர் என்பது குறிப்பிடத்தக்கதாகும்.

பிரதமராக இருந்தபோதிலும் சொந்த நலனில் கவனம் செலுத்துவதில் எவ்விதச் சிக்கலும் எழவில்லை என்று கூறும் அவர்,  ஒவ்வொரு வார இறுதியையும் தன் கணவருடனும், கைக்குழந்தையோடும் இனிமையாகக் கழிக்கிறார். மற்றவர்களைப் போல வீட்டுக்குத் தேவையான பொருள்களை வாங்க கடைக்குச் செல்லும் அவர் தன்னை ஒரு மிகச் சாதாரணமானவர் என்றே கூறிக்கொள்கிறார். அவ்வகையில் உலகம் அவரைத் திரும்பிப்பார்ப்பது இயல்புதான்.  

தினமணி இதழில் வாசிக்க: உலகின் இளம் பெண் பிரதமர் சன்னா மரின், தினமணி, மகளிர் தின  சிறப்புப்பக்கம், 8 மார்ச் 2020

மொழியாக்கம் ஒரு கலை

தினமணி நாளிதழின் தமிழ் மொழித் திருவிழாவில் 24 டிசம்பர் 2019 அன்று வெளியான, மொழியாக்கம் ஒரு கலை என்ற என் கட்டுரையின் மேம்பட்ட வடிவத்தைப் பகிர்வதில் மகிழ்கிறேன், அவ்விதழுக்கு நன்றியுடன். 

தினமணி நாளிதழுடன் கடந்த 10 ஆண்டுகளாக கார்டியன் (இலண்டன்), நியூயார்க் டைம்ஸ் (அமெரிக்கா), டான் (பாகிஸ்தான்) உள்ளிட்ட பல வெளிநாட்டு நாளிதழ்களைப் படித்து வரும்போது அவற்றில் வெளியான சில கட்டுரைகளை தமிழில் மொழியாக்கம் செய்யும் வாய்ப்பு கிடைத்தது.

ஆங்கில இதழ்களைப் படித்து தமிழில் மொழியாக்கம் செய்யப்பட்ட “நிதான வாசிப்பு ஒரு கலை”, “தமிழில் இந்த ஆண்டில் சொல் எது? ”, “அமெரிக்கா-கியூபா உறவு இப்படியும் ஒரு ராஜதந்திரம்”, “புளோரிடாவிலிருந்து ஹவானாவிற்கு”, “என்றென்றும் நாயகன் சே குவாரா”, “2017இன் சிறந்த சொல்” என்ற தலைப்பிலான கட்டுரைகள் தமிழ் இந்து நாளிதழில் வெளியாயின.

“நெல்சன் மண்டேலாவின் சுயசரிதையைப் பற்றிய மதிப்புரை” (எனக்குப் பிடித்த புத்தகம், தினமணி கதிர், 14 டிசம்பர் 2014) ஒரு மொழியாக்கமாகும். தொடர்ந்து “கடிதம் செய்த மாற்றம்” (தினமணி, 7 அக்டோபர் 2018), இலக்கை நோக்கும் உயரமான பெண் (தினமணி, 29 நவம்பர் 2018),   “உலக அரசியல் களத்தில் மகளிர்” (தினமணி, 17 ஏப்ரல் 2019), “மாற்றத்திற்கான மங்கை கிரேட்டா தன்பர்க்” (தினமணி, 4 செப்டம்பர் 2019) போன்ற கட்டுரைகள் வெளிநாட்டு இதழ்களில் வெளியான ஆங்கிலக் கட்டுரைகளிலிருந்து திரட்டப்பட்ட செய்திகளைக் கொண்டதாகும்.

இதற்கெல்லாம் மூல காரணமாக அமைந்தது இராஜராஜன் ஆயிரமாவது ஆண்டு விழாவின்போது வெளியான “ராஜராஜன் நேருவின் பார்வையில் (தினமணி கொண்டாட்டம், 26 செப்டம்பர் 2010) என்ற தலைப்பிலான கட்டுரை ஆகும். அக்கட்டுரை ஜவஹர்லால் நேரு எழுதிய உலக வரலாறு என்னும் ஆங்கில நூலில் காணப்பட்ட ராஜராஜ சோழன் மற்றும் ராஜேந்திர சோழனின் பெருமைகளைப் பற்றிய மொழியாக்கம் செய்யப்பட்ட செய்திகளைக் கொண்டதாகும்.

இவ்வாறாக பல ஆண்டுகளாக மொழியாக்கம் செய்துவரும் நிலையில் பல அனுபவங்களைக் காணமுடிந்தது. இந்த அனுபவங்கள் மொழியாக்கம் ஒரு கலை என்பதை உணர்த்தின.

அக்டோபர் 1984இல், இந்திரா காந்தி அவரது மெய்க்காப்பாளர்களால் சுடப்பட்டு இறந்தபோது ஓர் ஆங்கில நாளிதழில் இந்திரா காந்தி அசாசினேட்டட் என்றும் மற்றோர் ஆங்கில இதழில் இந்திரா காந்தி ஷாட் டெட் என்றும் செய்திகள் வெளியாகின. இரண்டு சொற்றொடர்களுமே இந்திரா காந்தியின் மரண நிகழ்வினைக் குறிப்பிட்டபோதும் அசாசினேட்டட் என்ற சொல்லானது சற்று கூடுதலான பொருளைத் தரும் வகையில் அமைந்திருந்தது. அசாசினேட் என்பதற்கு படுகொலை செய், மறைந்திருந்து தாக்கிக் கொல்லு, வஞ்சகமாகக்கொல்லு (ஆங்கிலம் தமிழ் சொற்களஞ்சியம், சென்னைப்பல்கலைக்கழகம், 2010) என்றும், முக்கிய நபரை குறிப்பாக அரசியல் காரணங்களுக்காக கொலை செய்தல் (ஆக்ஸ்போர்டு ஆங்கில அகராதி, 2010) என்றும் அகராதிகள் கூறுகின்றன. ஷாட் டெட் என்பதற்கு சுட்டுக்கொல்லு என்பது பொருளாகும். இவ்வாறாக சில சொற்கள் மூல மொழியில் அமையும்போதே முழுப்பொருளையும் தரும் வகையில் அமைந்துவிடுகின்றன.

மொழிபெயர்ப்பு என்பதிலிருந்து மொழியாக்கம் என்பது சற்று வேறு நிலையில் அமைகிறது. மொழியாக்கம் செய்யப்படும் செய்தியானது அனைத்துநிலை வாசகர்களுக்கும் சென்றடைய வாய்ப்புள்ளது. மொழிபெயர்ப்பு என்ற தளத்தில் நின்று மொழியாக்கம் செய்ய ஆரம்பித்தால் சொல்லுக்குச் சொல் என்பதே சாத்தியமாகும். மொழியாக்கத்தின்போது எல்லை சற்றே விரிய ஆரம்பிக்கிறது. மூல மொழியில் உள்ள மொழியாக்கம் செய்யப்படுகின்ற பொருண்மையினை முழுமையாக வாசித்து பின்னர் அதனைக் கிரகித்துக் கொண்டு, இலக்கு மொழிக்கு (மொழியாக்கம் செய்யப்படுகின்ற மொழி) அதனைக் கொண்டு செல்வது மொழிபெயர்ப்பாளரின் முக்கியமான கடமையாகிறது. அவ்வாறு செய்யும்போது அதனை எளிதாக வாசகர்கள் புரிந்துகொள்ளும் வகையில் அமைத்துக் கொள்ள வேண்டியது அவசியமாகும். மொழியாக்கத்தின்போது பொருத்தமான சொற்களைத் தெரிவு செய்து பயன்படுத்தவேண்டும். குழப்பம் தருகின்ற, மயக்கம் தருகின்ற, மாற்றுப்பொருள் தருகின்ற சொற்களைப் பயன்படுத்தாமல் இருப்பது மொழிபெயர்ப்பின் தரத்தினை மேம்படுத்தும்.

வல்லுநர்களிடம் உரையாடல், அகராதிகளைப் பார்த்து உறுதிசெய்தல்

மொழியாக்கம் செய்யப்படும்போது பலவிதமான சிக்கல்கள் ஏற்பட வாய்ப்புகள் உள்ளன. அவ்வாறு எழும்போது உரிய துறைசார் வல்லுநர்களோடு தொடர்பு கொள்ளலாம். அகராதிகள் மற்றும் தொடர்பான நூல்களைப் பார்த்து பொருத்தமானவற்றை எடுத்துக்கொண்டு பயன்படுத்தலாம். அவ்வாறு மொழியாக்கத்தின்போது தெளிவான பொருளைத் தருகின்ற வகையில் சொற்றொடர் அமைவதை உறுதி செய்துகொள்ள வேண்டியது அவசியம்.

சொல்லுக்குச் சொல் மொழியாக்கம்

சொல்லுக்குச்சொல் மொழியாக்கம் செய்யும்போது தெளிவின்மையையோ, மிகைப்படுத்தலோ அமையும். சில சமயங்களில் பொருத்தமாக இருக்கவேண்டும் என்பதற்காக சில சொற்களை விட்டுவிடவும் வாய்ப்பு உள்ளது. ஆதலால் சொல்லுக்குச் சொல் உள்ளது உள்ளபடியே மொழியாக்கம் செய்தும் உத்தியைத் தவிர்ப்பது நலம் பயக்கும். முழுமையாக வாசித்து, பொருளைப்புரிந்து பின்னர் சொல்வாரியாகவோ, சொற்றொடர்வாரியாகவோ, பத்திவாரியாகவோ இடத்திற்குத் தக்கவாறு மொழியாக்கம் செய்யலாம்.

இருமொழித் திறன்

மூல மொழியிலும் இலக்கு மொழியிலும் சமமான அளவு திறன் இல்லாவிட்டாலும்கூட, கிட்டத்தட்ட பொருளை விளக்குகின்ற அளவிற்கான மொழியறிவு இருப்பது அவசியமாகும். அவ்வாறு இல்லாத நிலையில் மொழியாக்கத்தில் ஒரு தெளினைக் காண்பது சிரமமாகும்.

சிறப்புக்கூறுகள்

மொழிக்கே உரிய சிறப்புக்கூறுகள், பதங்கள், சொல்லாடல்கள் அமையும்போது  அதனை மொழியாக்கம் செய்வது  எளிதன்று. உதாரணமாக மூல மொழி தமிழ் என்றும் இலக்கு ஆங்கிலம் என்றும் வைத்துக்கொள்வோம். அப்போது தமிழ் மொழிக்கே உள்ள தனித்தன்மை வாய்ந்த சொற்களையோ, சிறப்பான கூறுகளையோ, சொல்லாடல்களையோ, பழமொழிகளையோ அப்படியே பொருளைத் தரும்வண்ணம் மொழியாக்கம் செய்வது எளிதல்ல. தமிழ் மொழியின் இலக்கணம், இலக்கியம் போன்றவற்றில் அடிப்படையாக சிலவற்றை அறிந்திருந்தால் மட்டுமே மொழியாக்கம் செய்வது சாத்தியமாகும்.  ஆங்கிலத்திலிருந்து தமிழுக்கு மொழியாக்கம் செய்யும்போதும் இதனை மனதில் கொள்ளவேண்டும்.

சொற்றொடர் அமைப்பு

சில சமயங்களில் மூல மொழியில் குறைவான சொற்களைக்கொண்ட சொற்றொடர் அதிகமான சொற்களைக் கொண்டும், அதிகமான சொற்களைக் கொண்ட சொற்றொடர் குறைவான சொற்களைக்கொண்டும்  இலக்கு மொழியில் மொழியாக்கம் செய்யப்படும். அந்நிலையில் விடுபாடோ என்றோ, கூடுதல் என்றோ கருதாமல் பொருள் விளங்கும் வகையில் மொழியாக்கம் அமைந்துள்ளதா என்பதை உறுதி செய்தல் அவசியமாகும். நீண்ட சொற்றொடர்களாக அமைப்பதைவிட எளிதில் புரியும் வகையில் சிறிய சொற்றொடர்களாக பிரித்து அமைக்கும்போது வாசகர்கள் எளிதில் புரிந்துகொள்ள வாய்ப்பு உண்டு.

சமூகம் மற்றும் பிற சூழல்

சமூகம் மற்றும் பண்பாடு என்ற சூழலிலும், கடினமான பொருள் தரும் சொல் பிற மொழிச்சொல் என்ற நிலையிலும் தெளிவற்ற நிலையில் ஒரு சொல் அமையவோ, தவறாகப் புரிந்துகொள்ளவோ வாய்ப்புள்ளது. அப்போது மூல மொழியில் சொல்லப்பட்ட பொருண்மையின் பின்புலத்தை முழுமையாக அறிந்துகொண்டு மொழியாக்கத்தில் ஈடுபட்டு, பொருத்தமான சொல்லாக மொழியாக்கம் செய்யவேண்டும்.  அப்போது மூல மொழியில் வெளிப்படுத்தப்பட்டுள்ள நோக்கத்தையும், பின்னணியையும் மனதில் கொள்ளவேண்டும்.

குறியீடுகள் பயன்பாடு

தடித்த எழுத்து பயன்பாட்டினை உள்ளடக்கிய செய்திகளை மொழியாக்கம் செய்யும்போது இடத்தின் தன்மையினை அறிந்து உணர்வினை கவனமாக வெளிப்படுத்த வேண்டியது அவசியமாகும். தமிழிலும், ஆங்கிலத்திலும் குறிப்பிட்ட செய்தியை வலியுறுத்திச்சொல்லும்போது தடித்த எழுத்துகள் பயன்படுத்தப்படுகின்றன.  தமிழில் குறிக்கும்போது அவ்வாறான சொற்களுக்குப் பக்கத்தில் அடைப்புக்குறிக்குள் அழுத்திப்படிக்கவும் என்று இருப்பதைக் காணலாம். ஆங்கிலத்தில் எம்பசிஸ் ஆடட் என்றவாறு கூறப்பட்டிருக்கும். 

நவம்பர் 2019இல்  தமிழ் விக்கிப்பீடியா ஆசிய மாதக் கட்டுரைப் போட்டியினை அறிவித்திருந்தது. அதில் ஆசிய நாடுகள் தொடர்பாக ஆங்கில விக்கிப்பீடியாவில் உள்ள, தமிழில் இல்லாத கட்டுரைகளை மொழியாக்கம் செய்யும் வகையில் ஒரு விதி இருந்தது.   அந்தப் போட்டியில் கலந்துகொண்டு இந்தோனேசியா தொடர்பாக 150க்கும் மேற்பட்ட கட்டுரைகளை எழுதும் வாய்ப்பு கிடைத்தது. ஆங்கில விக்கிபீடியாவிலிருந்து தமிழ் விக்கிபீடியாவிற்கு மொழியாக்கம் செய்தபோது பெற்ற அனுபவங்களில் ஒன்று கோயில் தொடர்பானதாகும். தமிழகத்தில் அந்தந்த கோயிலைப் பற்றி எழுதும்போது அடைமொழியாக கோயில் என்று இடுகின்றோம். அவர்கள் புரா, கண்டி, கோயில்  என்று வேறுபடுத்துகின்றனர்.

ஒரு புரா என்பது ஒரு பாலினிய இந்துக் கோயிலாகும். இது இந்தோனேசியாவில் பாலினிய இந்து சமயத்தைப் பின்பற்றுபவர்களுக்கான வழிபாட்டுத் தலமாகும். பாலினிய கட்டிடக்கலையில் காணப்படும் விதிகள், நடை, வழிகாட்டுதல் மற்றும் சடங்குகளுக்கு ஏற்ப புராக்கள் கட்டப்பட்டுள்ளன. பாலி தீவில் பெரும்பாலான புராக்கள் காணப்படுகின்றன. பாலி, "ஆயிரம் புராக்களின் தீவு" என்று பெயரிடப்பட்டது.

கண்டி  என்பது இந்தோனேசியாவில் உள்ள ஒரு இந்து அல்லது பௌத்தக் கோயிலாகும். இது பெரும்பாலும் இந்து-பௌத்தக் காலமான கி.பி.4 மற்றும் கி.பி.15 ஆம் நூற்றாண்டுகளுக்கு இடைப்பட்ட காலத்தில் கட்டப்பட்டது. வழிபாட்டிற்காக அல்லது தகனம் செய்யப்பட்ட இந்து அல்லது பௌத்த மன்னர்கள் மற்றும் பிக்குகளின் அஸ்தியை சேமிப்பதற்காக பயன்படுத்தப்படும் ஒரு பழங்கால கல் கட்டிடம் என்று வரையறுக்கிறது. பண்டைய மதச்சார்பற்ற கட்டமைப்புகளான வாயில்கள், நகர்ப்புற இடிபாடுகள், குளங்கள் மற்றும் குளியல் இடங்கள் பெரும்பாலும் கண்டி என்று அழைக்கப்படுகின்றன.

          கோயில் அல்லது கோவில் என்பது திராவிட கட்டிடக்கலை கொண்ட இந்து கோவிலின் தனித்துவமான பாணிக்கான தமிழ் சொல்லாகும்.

மொழியாக்கம் செய்வோர் அப்பணியில் முழுமையாக தம்மை ஈடுபடுத்திக்கொள்ளவேண்டும். தாம் புரிந்துகொண்டதை அப்படியே வாசகர்களுக்கு கடத்துவது மொழியாக்கம் இல்லை.  வாசகர்கள் புரிந்துகொள்ளும் அளவில் மொழியாக்கம் அமைய வேண்டும். மொழியாக்கத்திற்கு அடிப்படையாக அமைவனவற்றில் வாசிப்பு முக்கியமானது. குறிப்பாக, தமிழ் மற்றும் ஆங்கில நாளிதழ்களை  தொடர்ந்து விடுபாடின்றி படிப்பதன் மூலம் மொழியாக்கத்திற்கான ஆர்வத்தை வளர்த்துக் கொள்ளலாம். துறை சார்ந்த நூல்களை வாசிப்பதன் மூலமும், துறை சார்ந்த அறிஞர்களுடன் உரையாடுவதன்மூலமாக மொழியாக்கம் தொடர்பான சிக்கல்களைத் தெளிவுபடுத்திக்கொள்ள முடியும்.

ஆங்கிலத்தில் மட்டுமே காணப்படுகின்ற பதிவுகளையும், கட்டுரைகளையும் தமிழில் மொழியாக்கம் செய்வதன் மூலமாக தமிழ் மொழிக்கு சிறப்பான பங்களிப்பினைச் செய்ய பல வாய்ப்புகள் காத்திருக்கின்றன. அவ்வாறே தமிழில் உள்ளவற்றை ஆங்கிலத்திலோ, பிற மொழிகளிலோ மொழியாக்கம் செய்யும்போது தமிழின் பெருமைகளை பிற மொழியினரும் அறிந்துகொள்ளலாம்.  மொழியாக்கத்தை ஒரு கலையாக எண்ணி மேற்கொள்ள ஆரம்பித்தால் பல புதியனவற்றை தமிழ் மொழிக்கும், தமிழ் மொழியிலிருந்து பிற மொழிகளுக்கும் கொண்டுசெல்வதற்கு மொழியாக்கம் ஒரு பாலமாக அமையும்.

-------------------------------------------------------------------------------------------

நன்றி:  தினமணி,  இணையதளம், 24.12.2019

-------------------------------------------------------------------------------------------

பிற கட்டுரைகளை வாசிக்க: கட்டுரைகள்

-------------------------------------------------------------------------------------------

19.6.2026இல் மேம்படுத்தப்பட்டது.

மாற்றத்திற்கான மங்கை கிரேட்டா தன்பர்க்

மாற்றத்திற்கான மங்கை கிரேட்டா தன்பர்க் என்ற என் கட்டுரை 4 செப்டம்பர் 2019 தினமணி இதழில் வெளியாகியுள்ளது. அதன் மேம்பட்ட வடிவத்தினைப் பகிர்வதில் மகிழ்கிறேன், அவ்விதழுக்கு நன்றியுடன்.

நோபல் அமைதிப் பரிசுக்காக ஸ்வீடன் பாராளுமன்ற இரு உறுப்பினர்களும், நார்வே பாராளுமன்ற மூன்று உறுப்பினர்களும் அவரது பெயரை பரிந்துரைக்கின்றனர். அப்பரிசினை அவர் பெறுவாரேயானால் உலகில் மிக இளம் வயதில் அதைப் பெற்ற பெருமையை அடைவார் ஸ்வீடன் நாட்டைச் சேர்ந்த பள்ளி மாணவியான கிரேட்டா தன்பர்க். தன் 15ஆம் வயதில், புவி வெப்பமயமாதலைத் தடுக்க நடவடிக்கை எடுக்கக்கோரி ஸ்வீடன் பாராளுமன்றத்தின் முன் ஆர்ப்பாட்டம் நடத்தி உலகை தன் பக்கம் ஈர்த்தது முதல் பருவ நிலை ஆர்வலாகக் கருதப்படுகிறார்.

3 ஜனவரி 2003இல் பிறந்த அவர் 2018இன் உலகின் மிகச்சிறந்த 25 இளைஞர்களில் ஒருவர் (டைம், டிசம்பர் 2018), 2019இன் மிக முக்கியப் பெண்மணி (உலக மகளிர் தினம், ஸ்வீடன், 2019), 2019இன்  மிகப் பிரபலமான 100 பேரில் ஒருவர் (டைம், ஏப்ரல் 2019), அடுத்த தலைமுறைத்தலைவர்களில் ஒருவர் (16ஆவது வயதில் முகப்பட்டையில் புகைப்படம், டைம் இதழ், மே 2019) என்ற சிறப்புகளைப் பெற்றவர்.  பிரிட்டனிலிருந்து வெளிவரும் வோக் இதழின் செப்டம்பர் இதழ் முகப்பட்டையில் மாற்றத்திற்கான சக்திகள் என்ற தலைப்பில் இடம்பெறவுள்ள 15 நபர்களில் இவரும் ஒருவராவார்.

அடுத்த தலைமுறைத்தலைவர்களில் ஒருவர் (16ஆவது வயதில் முகப்பட்டையில் புகைப்படம், டைம் இதழ், மே 2019)

வோக் செப்டம்பர் இதழ் முகப்பட்டையில் மாற்றத்திற்கான சக்திகள் என்ற தலைப்பில் இடம்பெறவுள்ள 15 நபர்களில் ஒருவராக கிரேட்டா தன்பர்க்

  

அவர் இளைஞர்களுக்கான ஃப்ரைஷுசெட் மாதிரி விருது (ஸ்டாக்ஹோம், நவம்பர் 2018), ஜெர்மனின் கோல்டன் காமரா சிறப்பு பருவநிலை பாதுகாப்பு விருது (ஜெர்மனி, 31 மார்ச் 2019), 15 முதல் 25 வயது இளைஞருக்கான விடுதலை விருது (நார்மாண்டி, பிரான்ஸ், 1 ஏப்ரல் 2019), பேச்சு சுதந்திரத்திற்கான ஃப்ரிட் ஆர்ட் விருது (பிறிதொரு அமைப்புடன் இணைந்து, நார்வே, 12 ஏப்ரல் 2019), லாடாடோ சி விருது (மிலேரேப்பா பவுன்டேஷன், சிலி,  ஏப்ரல் 2019), மனசாட்சிக்கான தூதுவர் விருது (பன்னாட்டு மன்னிப்பு அவை, லண்டன், 7 ஜுன் 2019), மதிப்புறு முனைவர் பட்டம் (மோன்ஸ் பல்கலைக்கழகம், பெல்ஜியம், ஜுன் 2019), கெட்டிஸ் சுற்றுச்சூழல் விருது (ராயல் ஸ்காட்டிஷ் ஜியாபிரபிகல் சொசைட்டி, ஸ்காட்லாந்து, 12 ஜுலை 2019) உள்ளிட்ட பல விருதுகளைப் பெற்றுள்ளார்.

பிப்ரவரி 2018இல் அமெரிக்காவில் பள்ளியில் நடைபெற்ற துப்பாக்கிச்சூட்டின்போது அவருக்கு பருவநிலையினைப் பாதுகாப்பதற்காகப் போராட்டம் மேற்கொள்ளவேண்டும் என்ற எண்ணம் உதயமானது. அதன் விளைவாக அப்போதே சில மாணவர்கள் பள்ளிக்குச் செல்ல மறுத்தனர். அதுமுதல் அவருடைய கவனம் பருவநிலையைக் காப்பாற்றுவதில் ஈடுபட்டது.

மே 2018இல் ஸ்வீடனின் ஸ்வென்ஸ்கா டாக்லாடெட் இதழ் நடத்திய கட்டுரைப் போட்டியில் வென்றவர்களில் இவரும் ஒருவர். கட்டுரை வெளியானபின் பருவநிலை மாற்றத்துக்காகப் பாடுபடும் குழுவினர் அவரோடு தொடர்புகொள்ளவே, அவர்களுடைய கூட்டங்களில் கலந்துகொண்டார். அவர்கள், பள்ளி மாணவர்கள் பருவநிலை மாற்றத்திற்காக போராட்டம் செய்யலாம் என்றபோது அவர் பலரை அம்முயற்சியில் ஈடுபடுத்த முயன்றார். எவரும் முன்வராத நிலையில் தானே களத்தில் இறங்கினார்.

20 ஆகஸ்டு 2018இல், ஒன்பதாம் வகுப்பு படித்தபோது அவருடைய தனிப்பட்ட ஈடுபாடு தொடங்கியது.  ஸ்வீடனில் தேர்தல் நடைபெறவிருந்த 9 செப்டம்பர் 2018 வரை பள்ளி செல்வதில்லை என முடிவெடுத்தார். அப்போது ஸ்வீடன் 262 ஆண்டுகளில் மிகக்கொடிய வெப்பத்தை எதிர்கொண்டது. அக்காலகட்டத்தில் பாராளுமன்றக்கட்டடத்தின் முன்பாக தனியாக, போராட்டத்தை ஆரம்பித்து, பாரிஸ் பருவ நிலை ஒப்பந்தத்தில் குறிக்கப்பட்டுள்ள அளவு கார்பன் வெளியேற்றத்தைக் குறைக்கவேண்டும் என்று வேண்டுகோள் வைத்தார். மூன்று வாரங்கள் தினமும் பள்ளி நேரத்தில் பருவநிலையைக்காக்க பள்ளிப்போராட்டம் என்ற பதாகையுடன் அமர்ந்து போராட்டத்தில் ஈடுபட்டார்.

8 செப்டம்பர் 2018இல் ஏழு கண்டங்களில் 95 நாடுகளில் நடைபெற்றபோது புருஸ்ஸேல்சில், ஐரோப்பிய பாராளுமன்றத்தின்முன்பாக நடைபெற்ற போராட்டத்தில் கலந்துகொண்டார்.

31 அக்டோபர் 2018இல் லண்டன் பாராளுமன்ற சதுக்கத்தில், காந்தி சிலையின் முன்பாக எக்ஸ்டின்சன் ரெபெல்லியன் அமைப்பு நடத்திய போராட்டத்தில் கலந்துகொண்டு “நம் தலைவர்கள் குழந்தைகளைப் போல நடந்துகொள்கின்றனர். நாம் விழிப்புணர்வினை உண்டாக்கி அனைத்தையும் மாற்றவேண்டும்” என்றார்.

24 நவம்பர் 2018இல் ஸ்டாக்ஹோமில் டெட் மாநாட்டில் பேசும்போது அவர், பருவநிலை மாற்றத்தைப் பற்றி முதன்முதலில் தன் எட்டு வயதில் கேள்விப்பட்டதாகவும், அதற்கு முக்கியத்துவம் தராப்படாததற்குக் காரணம் புரியவில்லை என்றும் கூறினார். 

டிசம்பர் 2018இல் போலந்தில் நடைபெற்ற ஐக்கிய நாடுகள் சபையின் பருவநிலை மாற்ற மாநாட்டில், பள்ளியில் போராட்டம் ஆரம்பமானதற்கான காரணங்களைக் குறிப்பிட்டுப் பேசினார். அதே மாதத்தில் 270 நகரங்களைச் சேர்ந்த 20,000க்கும் மேற்பட்ட மாணவர்கள் இவ்வகையான போராட்டங்களில் ஈடுபட ஆரம்பித்தனர்.

23 ஜனவரி 2019இல் டாவோஸில் உலகப்பொருளாதார மன்றத்தில் நடைபெற்ற கூட்டத்திற்கு பேராளர்கள் 1500க்கும் மேற்பட்ட தனியார் சொந்த விமானங்களில் வந்தபோது அவர் 32 மணி நேர பயணித்து ரயிலில் வந்தார். கூட்டத்தில், "சில நபர்களும், சில நிறுவனங்களும், குறிப்பாக, கொள்கை முடிவு எடுப்போர் சிலரும் கற்பனைக் கெட்டாத அளவிலான பணத்தைச் சம்பாதிக்க விலைமதிக்க முடியாத பலவற்றை இழக்கிறார்கள். உங்களில் பலர் அவ்வகையினர் என நினைக்கிறேன்" என்றார்.

பிப்ரவரி 2019இல் 224 கல்வியாளர்கள் இணைந்து அவருடைய முயற்சியாலும், போராட்டத்தில் ஈடுபட்டுள்ள மாணவர்களின் செயலாலும் கவரப்பட்டதாகவும், அவர்களுக்கு மரியாதை தரப்படவேண்டும் என்றும் கூறினர். 21 பிப்ரவரி 2019இல் ஐரோப்பிய பொருளாதார மற்றும் சமூகக்குழுவின் மாநாட்டிலும், ஐரோப்பிய ஒன்றியத்தின் தலைவரிடமும் அவர், “பாரிஸ் பருவநிலை ஒப்பந்தப்படி உலக வெப்பமயமாதலை 2 டிகிரி செல்ஷியஸுக்கு மிகாமல் கட்டுப்படுத்த  ஐரோப்பிய ஒன்றியம் கார்பன் டை ஆக்ஸைடு உமிழ்வினை 2030க்குள் 80 விழுக்காட்டிற்கு அதாவது பாரிஸ் ஒப்பந்தத்தில் குறிக்கப்பட்ட இலக்கான 40 விழுக்காட்டின் இரு பங்காகக் குறைக்கவேண்டும். அதில் நாம் தவறினால் நம் அரசியல் தலைவர்களின் மரபார்ந்த கொள்கைகள் மனிதகுல வரலாற்றின் பெரும் தோல்வியாகக் கருதப்படும்” என்றார்.

மார்ச் 2019இல் தொடர்ந்து ஒவ்வொரு வெள்ளிக்கிழமையும் ஸ்வீடன் பாராளுமன்றத்தின் முன் போராட்டத்தைத் தொடர்ந்தார். அவ்வப்போது சில மாணவர்கள் அவருடன் சேர்ந்துகொண்டனர்.

15 மார்ச் 2019இல்  112 நாடுகளைச் சேர்ந்த 1.4 மில்லியன் பள்ளி மாணவ மாணவியர்கள் பருவ நிலை மாற்றத்தைத் தடுக்க அரசுகள் நடவடிக்கை எடுக்கவேண்டும் என்று வலியுறுத்தி தம் வகுப்புகளைப் புறக்கணித்து அடையாளப் போராட்டம் நடத்தினர்.

மார்ச் 2019இல் பெர்லினில் பிரான்டென்போர்க் வாயிலின்முன் கூடியிருந்த 25,000 பேருக்குமுன் "எதிர்காலம் அழியப்படுவதை எதிர்ப்பதற்காக குழந்தைகள் தம் படிப்பையே தியாகம் செய்யவேண்டிய ஒரு வித்தியாசமான உலகில் வாழ்கிறோம்” என்று பேசினார். 

ஏப்ரல் 2019இல் ஐரோப்பியப் பாராளுமன்றத்தில் நடைபெற்ற கூட்டத்தில், “பிரிக்ஸிட்டுக்காக மூன்று அவசரக் கூட்டங்களைக் கூட்டுகின்றார்கள், ஆனால் பருவநிலை மாற்றத்தையும், சுற்றுச்சூழலையும் காப்பாற்ற எவ்வித அவசரக்கூட்டமும் கூட்டப்படவில்லை” என்று பேசினார்.

24 மே 2019இல் 125 நாடுகளைச் சேர்ந்த மாணவர்களைக் கொண்ட போராட்டம் நடைபெற்றது.  மே 2019இல், பாரிஸ் பருவ நிலை ஒப்பந்தத்தை துரிதப்படுத்த ஆஸ்திரியாவில் நடத்தப்பட்ட, 30 நாடுகளைச் சேர்ந்த 17,000 பேர் கலந்துகொண்ட மாநாட்டில் கால நிலை மாற்றம் தொடர்பான இடை அரசின் இடைக்கால அறிக்கையை மேற்கோள் காட்டிப் பேசும்போது, “தோராயமாக 2030க்குள் எதிர்பார்த்த மாற்றங்களைச் செய்யாவிடில், மனித சக்தியால் கட்டுப்படுத்த முடியாத பேரழிவினைச் சந்திக்கும் நிலைக்கு ஆளாவோம்" என்றார்.

ஆகஸ்டு 2019இல் ஜெர்மனியில் உள்ள ஹம்பாச் காடுகளுக்குப் பயணித்த அவர், நிலக்கரிச்சுரங்கத்திற்காக அங்கு மரங்கள் வெட்டப்பட்டு அக்காடு அழிக்கப்படுவது தடுத்து நிறுத்தப்படவேண்டும் என்று குரலெழுப்பினார்.

“2018வாக்கிலேயே நீங்கள் ஏன் எவ்வித நடவடிக்கையும் எடுக்கவில்லை என்று தன் குழந்தைகளும், பேரக்குழந்தைகளும் என்னை நோக்கிக் கேட்பர்” என்ற தன்பர்க், உரையின் நிறைவாக  “விதிமுறைகளுடன் விளையாடிக்கொண்டு நாம் உலகை மாற்றமுடியாது. ஏனென்றால் விதிகள் மாற்றப்படவேண்டும்” என்றார்.

“என் எதிர்ப்பைத் தெரிவிக்காவிட்டால் நான் இறந்துகொண்டிருப்பதாக உணர்கிறேன்” என்ற அவர் ஸ்வீடன் பாராளுமன்றத்தின் வெளியே துண்டறிக்கைகளை விநியோகித்தார். அதில் “நான் இதை ஏன் செய்கின்றேன் என்றால் பெரியவர்களாகிய நீங்கள் எங்களின் எதிர்காலத்தைப் பாழடித்துக்கொண்டிருக்கின்றீர்கள்”.

அவள் வகுப்பிற்குப் போகாமல் இருப்பதை அவளுடைய தந்தையார் விரும்பவில்லை. இருந்தாலும் அவளுடைய நிலைப்பாட்டை அவர் மதிக்கின்றார். அவள் வீட்டில் இருந்துகொண்டு மகிழ்ச்சியின்றி இருக்கலாம் அல்லது தன் எதிர்ப்பைத் தெரிவித்து மகிழ்ச்சியோடு இருக்கலாம். வீட்டிலுள்ளோர்  இறைச்சி உண்பதை விட்டுவிடவேண்டும் என்பதில் கவளமாக இருந்தாள். எங்களுடைய எதிர்காலத்தை அவர்கள் திருடிக்கொண்டிருக்கின்றார்கள் என்று கூறினாள். உலகளவில் அவளைப் பேசுவதற்கு அழைத்தபோதிலும் வெளிநாட்டிற்கு அவள் செல்லவில்லை.

அவள் வகுப்பினைத் தவிர்ப்பதை பற்றி அவளுடைய ஆசிரியர்கள் பலவாறான கருத்துகளைக் கூறுகின்றனர். "பொதுமக்கள் என்ற நிலையில் பார்க்கும்போது நான் செய்வது அவர்களுக்கு நல்லதாகத் தெரிகிறது. ஆசிரியர்கள் என்ற நிலையில் அவர்கள் என்னிடம் இதுபோன்றவற்றில் ஈடுபடுவதை நிறுத்திக்கொள்ள வேண்டும்". அவளுக்கு ஆதரவாகப் பேசும் ஆசிரியர் கூறுகிறார்: "கிரேட்டா தொந்தரவு தருபவளாகத் தெரிகிறாள். பெரியவர்கள் கூறுவதை அவள் கேட்பதில்லை. ஆனால் நாம் ஒரு பேரழிவினை நோக்கிச் சென்றுகொண்டிருக்கின்றோம் என்பதை உணரவேண்டும். அந்த வகையில்  சரியில்லாதது என நாம் நினைப்பதை சரி என்றே கொள்வோம். "

14 ஆகஸ்டு 2019இல் அமெரிக்காவிற்குப் படகில் புறப்பட்டார் கிரேட்டா தன்பர்க். 23 செப்டம்பர் 2019இல் நியூயார்க்கிலும், 2-13 டிசம்பர் 2019இல் சான்டியாகோவிலும் நடைபெறவுள்ள பருவநிலை மாநாடுகளில் கலந்துகொள்ள அமெரிக்கா பயணத்தை மேற்கொண்டார்.   

பயணித்துகொண்டிருக்கும்போதே தன் கடல் அனுபவங்களை டிவிட்டரில் பதிந்துகொண்டே வந்தார். தன் போராட்டம் தொடங்கி ஓராண்டு ஆனதையும் அதில் பதிந்திருந்தார்.  

விமானப்பயணத்தைத் தவிர்க்க படகில் பயணித்த அவர், 28 ஆகஸ்டு 2019 அன்று நியூயார்க் வந்தடைந்தார்.

30ஆகஸ்டு 2019இல் ஐ.நா.சபையின் முன்பாக போராட்டம்

மே 2019இல் பெங்குவின், கிரேட்டா தன்பர்க்கின் உரைகளைத் தொகுத்து No One Is Too Small to Make a Difference  நூலாக வெளியிட்டுள்ளது. கிரேட்டா தன்பர்க்கின் குடும்பக் கதை Scenes from the Heart என்ற தலைப்பில்  ஆங்கிலத்தில் 2019 இறுதிக்குள் வெளிவரவுள்ளது. 2018இல் ஸ்வீடிய மொழியில் தன்பர்க்கின் பெற்றோர், அவருடைய சகோதரி மற்றும் தன்பர்க்கால் எழுதப்பட்ட அந்நூலில் தன்பர்க்கின் தாயாரின் படம் இடம்பெற்றிருந்தது. ஜெர்மன் மொழியில் வெளியான நூலில் தன்பர்க்கின் புகைப்படம் அட்டைப்படத்தில் இடம்பெற்றுள்ளது.  மே 2019இல் ஓவியக்கலைஞர்  ஜோடி தாமஸ் பிரிஸ்டல் நகரில் தன்பர்க்கின் 50 அடி உயரமுள்ள ஓவியத்தினை வரைந்திருந்தார். அதில் அவருடைய பாதி முகம் கடல் அலையிலிருந்து எழுவதுபோல சித்தரிக்கப்பட்டிருந்தது.  மே 2019இல் வைஸ் அமைப்பு Make The World Greta Again  என்ற, ஐரோப்பாவின் இளம் போராட்டத் தலைவர்களின் பேட்டிகளைக்கொண்ட 30 நிமிட ஆவணப்படத்தை வெளியிட்டது. 

தன்பர்க்கும் அவளுடைய சகோதரியும் அஸ்பெர்கர் சின்ட்ரோமால் பாதிக்கப்பட்டவர்கள் என்று அவர்களுடைய தாயார் கூறியுள்ளார். இக்குறைபாடு உள்ளோர் மற்றவர்களை புரிந்து கொள்வதிலும் மற்றவர்களுடன் பேசுவதிலும் எதிர்வினையாற்றுவதிலும் துன்பமுறுவர் என்றும், தங்கள் செயல்களில் ஆழ்ந்த ஈடுபாட்டுடன் இருப்பர் என்றும், இது ஓர் வளர்ச்சிக் குறைபாடே அன்றி நோயல்ல என்றும், இக்குறைபாடு உள்ளவர்களால் பின்னர் நண்பர்களை ஏற்படுத்திக்கொள்ளவும், பயனுள்ள பணிகளை ஆற்றவும் வெற்றிகரமான வாழ்க்கை மேற்கொள்ளவும் இயலும் என்றும் கூறுவர்.

நிறமற்றதையும், காற்றில் வெளிப்படுத்தப்படுகின்ற கண்ணுக்குப் புலனாகாத கார்பன் டை ஆக்ஸைடை கண்களால் காணும் அரிய சக்தி அவருக்குள்ளதாகவும், புகைபோக்கியிலிருந்து வெளியே வந்து அது சுற்றுச்சூழலை குப்பைமயமாக்குவதையும் அவளால் பார்க்க முடிவதாகவும், அதனால் அவர் பருவநிலைமாற்றத்திற்கு பங்களிக்கிறார் என்றும் அவருடைய தாயார் கூறுகிறார்.

பல பள்ளி மாணவர்கள் பருவநிலைப் போராளிகளாக ஆவதற்கு தூண்டுகோலாக அவர் ஏற்படுத்திய தாக்கத்தை, கிரேட்டா தன்பர்க் விளைவு என்று கூறுகின்றனர். பலவித சோதனைகளை எதிர்கொண்டு தன் பயணத்தை தொடர்கிறார்.

தினமணி, மகளிர் மணி, 4 செப்டம்பர் 2019

கிரேட்டா தன்பர்க் பற்றி வெளியான மற்றொரு கட்டுரை:

ரியலி கிரேட்டா தன்பர்க், புதிய தலைமுறை பெண், அக்டோபர் 2019